Vawiin October ni 12, 2023 (Ningani) hian Aizawl North – III huam chhung Electric Veng ZPM Information Office hawnna leh Pathian hnena hlanna inkhawm neih a ni a. He hun hi Pu Vanlalduha, Electric Veng ZPM Unit President-in a kaihruai a, Rev. KC Vanlalduha’n Pathian hnena hlanna hun hmangin Aizawl North – III ZPM Official Candidate leh ZPM Working President ni bawk Pu K Sapdanga’n Information Office hawnna neih pahin thu a sawi.
Pu K Sapdanga chuan, “Election Commission of India in inthlan hun atan November 7, 2023 a ruat hian party dangte a ti chi-ai a ni mai thei. Keini ZPM party chu min barakhaih lo a, hei aia hnai hi ni se kan la duh zawk. Kan inbuatsaih hma deuh avang khan nuihsawh lo hlawh tawh mah ila, kan rin phak hauh lohin remruattu fel takin rem a ruat a ni ang tih kan ring a, lawm takin kan lo pawm a ni,” a ti.
Aizawl North – III ZPM Official Candidate chuan, “Aizawl North III biala kan khingpui turte hi, tuna ruling MLA ni mek, mi fel tak, nungchang tha, hawihhawm, nelawm tak a ni a, pakhat zawk hi Minister thil ti thei tak ni chunga kum 10 lai min lo enkawl tawhtu a ni bawk. Bial tana an sulhnute a chhuanawm takzet a, bial vannei tak kan ni. Keini hian corruption laka fihlim intiamin, party sorkar ni lo, kalphung thar mipui sorkar kan aupui a, hmaa mite sulhnu tha chhunzawm thei turin, mipuite khawngaih vote ka dil a ni,” a ti bawk.
