Vawiin ni 5.11.2022. (Inrinni) Chawhnu dar 1:00 khan Serchhip Bazaar-ah MPCC Campaign Committee ruahman angin Serchhip Block leh Serchhip West Block Congress Committee-ten Joint Block conference leh mi thar lawmluhna hun hman a ni a. MPCC President Lalsawta chuan MNF Headquarter-a Secretary ni lai Vanlaltluanga leh mithar 171 a lawmlut bawk.
MPCC President Lalsawta chuan, Kan lawm luhte hian kan party duh, ram mipui rualkhai taka hmasawnna an rawn tawm vang a ni. Congress party tan mai ni lo, ram tana mi rinawm leh khua leh tui tha ni tura hnathawk turin kan lawmlut che u a ni, a ti.
Serchhip bialin tum MLA-ah tum nga (5) Pu Lal Thanhawla in thlan avang hian Remna leh muanna, Hel awm lohna ramte Mizoramin kan neih phah a, tunah leh keini kan awm loh hnuah pawh hriat reng a ni tawh ang. Kan ram rohlu leh hmasawnna tam tak min siam saktu leh remna leh muanna then nana in pe, Dr. Lal Thanhawla hnathawk thei siamtu bial in ni.
Vawiinah Serchhip bial hma-sawnna thlen tur leh Pu Lal Thanhawla hnathawh chhunzawm turin Pu Vanlaltluanga kan sawm a, amah kaltlangin he bial hma-sawnna hna hi Congress party in a thawk zel dawn a ni, a ti. Pu Lalsawta chuan, nakumah kan inthlang dawn – Party te inralrin/inpuahchah dan a in ang lo dawn khawp mai. Sum hmanga sorkar tumten an zia an chhuah dawn. Inthlana sum chakna hi kan thah loh chuan ram rorelnaa sum hman dik lohna hi a nung reng ang. Vote tura lei theih kan nih chuan Sal leh Nawhchizuar ang lek kan ni ang. Dik lohna ata kan ram chhan tur hian kum khat chhung lek sum hmanga thlemna laka kan inthiar fihlim a ngai a ni a ti.
Congress party memberte leh mipuite ka ngenna chu inthlan hautak lo leh sum hmanga inthlan thianghlim lo kan hnualsuat theihna turin vawiin atanga tanin Candidate kan neih hunah pawh sum hmang lovin chak i tum ang u. Hei hi Pathian, Kohhran, MPF leh ECI te duh dan a ni. Sum hmang tam lova Pathian chakna zawk kan rin ngam chuan suma rinna nghattute hi kan hneh ang. Sorkar thianghlim, viak tha leh mipui hmangaihna ram siam hi thil harsa a ni lo. Dik lova hausak hi malmak ila, mamawh nei tlem ila a tawk. Sum saltanna atanga chhuak turin keimahni hi kan chhuah hmasak a ngai.
Sorkar tha kan neih chuan loneitu, Kuthnathawk, thawh tur nei lo kan Thalaite hian eizawnna ngelnghet an nei ang a. Congress party Manifesto No. 1 “Tang Puihna” hmang hian Mizoram hi mi taimate dinchhuahna rama siam hi kan tum a ni. Kan thlai thar leh ran vulh atanga tharchhuah a tam chuan heng kan thil thar chhuah tam zawkte hmang hian eizawnna ngelnghet tam tak a awm dawn a ni a ti.
Lalsawta chuan, Serchhip leh Thenzawl bikah hian sorkar huna chhunzawm tur leh a thara kan tihtur hna tam takin min hmuak mek. Tuikum tui hi 1997-ah Serchhip Water Supply Phase-I siamin vawiin thlengin la hman tangkai a ni. Mahse, Serchhip khawpui thanglian zel chawm turin Tuichang lui atanga tui lak a, Phase-II siam a ngai. Mat phaia thlai chawmna tur tuikhuah lian zawk, thlai chawmtu tuilak maintain that loh leh chhunzawm mumal loh hi chhunzawm thuai hi Mat phai hausakna haichhuak tura i he bial hnuk a ni. Kikawn atanga Sailiamkawn inkar Km 8 vel hi kawng lian zawk leh tha zawka siam a tul a, Sport Complex leh Serchhip Auditorium MNF sorkarin la peih fel tha lova a hawn tak ngawt, sum tam tak senga sak hi enkawltu mumal siama enkawl that a ni ang a, a panna kawng zauh leh siam that a ni bawk ang.
Eklavya Residential School uluk zawk leh a nih tur anga enkawl a ni dawn tih sawiin, School in tih mai theih tih si loh hi kan ti mai dawn tih sawiin, an remchanna neih hman tangkai lohte ngaih pawimawh a ni dawn a. A panna kawng tha zawk siamin Water supply te pawh ngaihtuah a ni ang. Paragliding site te, Serchhip khaw hmun hlui leh Thenzawl leh hmun danga Tourist Attractions ni thei te hi an hlutna tipung turin nasa taka zin mite hip tur leh sum lakluhna lian ni thei turin buatsaih a ni ang, a ti.
He hunah hian R. Vanlaltluanga MPF General Headquarters-a Secretary atanga Congress Party a lawmluh chuan thu sawiin, VL Robiaka President, ADCC leh PC Laltlansanga te pawhin thu an sawi bawk.
Serchhip Joint Block Conference hi Lalramnghaka Kawlni, President, SBCC in a kaihruai a. Hunserh Rev. Rolungmuana Zadeng, Councellor, Family Guidance & Councelling Centre, Serchhip in hunserh a hmang a ni.
