Vawiin khan Department of Information and Public Relations leh Mizoram Art Development Society (MADS) tangkawpa an buatsaih ‘Mizoram Annual Art Exhibition 2022’ hawnna chu Aizawl Art Gallery, Khatla ah neih a ni a; Food, Civil Supplies & Consumer Affairs Secretary Ramdinliani chu khuallian niin exhibition hi a hawng.
Mizoram Annual Art Exhibition hawnna hun Laltanpuia, President, MADS kaihhruaiah khuallian Ramdinliani chuan MADS-in kum 10 hial hmel a hmu ta chu a lawmpui thu a sawi a. Art chi hrang hrang zingah hmuh theih kutchhuak (visual art) chu mi rilru sukthlek tidanglam theitu, mi tihlim veng veng thei a ni a ti a, art hi thawnthu sawina hmanrua, hnam chanchin hluite leh hnam ziarang phochhuahna tha tak a nih thu a sawi bawk. MADS chu mi nazawng tel theihlohna pawl a ni a, member te pawh inchhuang hle thei an ni tiin Ramdinliani chuan a bikin hmeichhe member lo kal pariat te chu tan la zual t?rin a fuih. State ang pawha Art-ah hmasawnna rahbi a nih theih nan duhsak a hlan a ni.
I & PR department aiawhin PB Lianthangpuii, Joint Director, DIPR pawhin thu sawiin, artist te chuan zalenna zau tak an nei a, chu an zalenna chu hmang tangkai turin leh mipuite kawng kawhhmuhtu ni thei turin a fuih a. Lemziak thiamte chuan an zalenna chu ram leh hnam hmasawnna atan leh khawtlang nun thalo siamthatna tur auchhuahpui a, mipuite zirtirna atana hmang tangkai turin a fuih bawk a ni. PB Lianthangpuii chuan vawiina artist lo kalte chu mellung pawimawh tak in ni a, Mizo khawtlang leh hnam zemawi vawng nung tlattu in ni a ti.
Vawiina hawn tak MADS Exhibition-ah hian Mizoram hmun hrang hrang atangin lemziak thiam (artist) 65 ten an lemziak pakhat theuh an phochhuak a.He exhibition hian November 7-12 thleng a awh dawn a ni. MADS hnuaiah hian member 86 an awm mek a, kum tinin Associate member dilna hun an hawng thin a, a titha zualte hnenah member nihna pek an ni thin.
