I&PR Minister-in a department chan inhlantharna hun hmanpui

Information & Public Relations Minister Lalruatkima chuan vawiin khan I&PR Department-a thawk zawng zawngte Kum thar 2023 atana Inhlan Tharna Hun, I&PR Auditorium-ah a hmanpui. Inhlan Tharna Hun hi I&PR Director C.Lalnunkima chuan a kaihruai a, Joint Director F.Lalfakzuala chuan Bible Chhiarna leh Tawngtaina hun a hmang a ni.
Minister Lalruatkima chuan kum 2020 March atangin Covid in min nuai a, kan hriat theuh angin I&PR Department chu a hma zawng aiin kan buai zawk tih turin hun kan hmang a, disaster kan tawn lai pawhin mipui kawng kawhhmuh leh thudik tak hrilhhriat hna tha taka Department in a thawh avangin Minister a nihna angin lawmthu a sawi a. Thu dik tawk lo social media-ah a darh chak em em laiin, sawrkar thuthar thehdarhnaah hmasawnin Information and Public Relations Department chuan tan la in, twitter, instagram leh a dangahte thahnem ngai takin mipui rawng an bawl a, mipui chi ai taka an awm lai pawhin I&PR Department in thu chhuah a neih loh chuan mipui ten a dik tawk lo a niang e tiin thuthlukna fel tak an siam mai a ni a ti a. Minister chuan Kum 2022 ah hripuiin min kiansan chho a, kum 2023 kan lo chuan kai takah chuan hripui leng te pawn kiam lam a pan chho zel a, heng hripui len vanglai kum hnih chhung teh meuh mai nitin covid chungchang update kan nei thei thin te kha thawktute inpekna leh thahnem ngaihna a ni a ti a.
Minister chuan Kum tharah hian kan enkawl Journalist te, Film siamtu leh, Art, Photography lama tui society leh pawl hrang hrangte nen inrem taka kaldan kan thiam a pawimawh a ni a ti a. Ram rawng kan bawlna kawngah Public Relations a pawimawh thu sawiin, mipui leh sorkar in inlai chinna tha a neih theihna tura min pawt hnai tu, leihlawn dawhtu Department kan nihna ang a thahnem ngai taka thawka, tang nasa leh zual turin a fuih a ni.
Minister chuan District thar- Khawzawl, Hnahthial leh Saitual-ah DIPR office hawn phalna te, DC Office building-a kan awmna tur te sawrkarin kan mamawh a ni tih hria in a buatsaih chho zel a ni a ti a. Serchhip District a DIPR office pawh sorkarah kan dil angin sanctioned post ah hlan a nih thu a sawi a. PWD lamah post thar kan neih belh bakah, Combined MPSC 2022 kal tlanga MIS Post 4 kan neih belh hi hmasawnna tha tak a ni a ti a. Mizoram Information Service indaihlohna sawrkar in hriain Kum 2023 atan post 5 min phalsak bawk a ni a ti a. Pension in kan hotute an kal chhuaka, mitharin min belh zel laiin Department in hmalak tawhna tam tak nei mah se hmasawnna tur tam tak a nei a ni a ti bawk.
Minister Lalruatkima chuan Kum tharah hian hma sawnna eng nge ka neih ang tih hi kan zawhna ni theuh se, mawhphurhna hrang hrang hlenchhuak zel turin tan la a, hmalam pan zelturin duhsakna a hlan a ni.
I&PR Director C. Lalnunkima pawhin thu sawiin Department enkawltu Minister viaktha leh engkim chik, thahnem ngai Minister remhre tak Department in a neih avangin lawmthu a sawi bawk a ni.
He hunah hian I&PR Secretariat Joint Secretary Betsy Zothanpari Sailo leh midangte an tel a. Joint Director PB Lianthangpuii’n lawmthu sawiin he hun hi a khar a ni.