NABARD( RIDF-XXIV) sum Rs.528.92 lacs hmanga Rural Development Department hmalakna, Springshed Development & Water Supply for Chalfilh Catchment Area chu vawiin khan Rural Development Minister Lalruatkima’n Khanpui ah a hawng.
Hawnna inkhawm Khanpui Bazar-sheda neihah thu sawiin Lalruatkima chuan, Covid hripui avangin khawvel pumin hun khirh leh harsa tak a tawk a. Kum 2 chhung engmah ti thei lova inkharkhipna boruak hrehawm tak hnuah tluang taka kum thar kan chuangkai chu lawmawm a tiin kum 2023 chu chhungkua leh mimal tan malsawmna thlen turin mipuite duhsakna a hlan a. Mizote chu pi leh pute chenah tuikang nghak thin kan ni tiin chutiang hun hrehawm leh harsatna te chu hmasawnna in a her liampui tawha ni, a ti a. Ramin hma a sawn rualin kan chenna leilung leh boruakin chhiat lam a pan a, tuihna te a lo tlem tial tial thung a. Kan ramngaw te leh tuihna te siam thar leh turin khawvel ram lian te leh India sawrkar ngei pawhin nasa takin hma a la tih a sawi a. Heng avang hian kan thing leh mau ti chereu lo zawnga theihtawp chhhuah hi kan tih makmawh a ni tiin Minister chuan van ruahtui dawn khawl nachang hriat a pawimawh thu leh heng tui lakna leh dawn khawlna atana sawrkar hmalakna te mipuiin neitu rilru pua duat taka an enkawl thiam a pawimawh thu a sawi a. Tui kan hnianghnar chuan faina leh thianghlimna kawngah te, hriselna kawngah te nasa takin hma kan sawn thei dawn a. Sawrkarin mipuite hnena tui thianghlim pek hi a mawhphurhna a ni a, chumi rualin tui lakna hmunhma leh hmanrua te engtik lai pawhin sawrkarin a vil reng thei lo va, a khaw neitu mipui ten hemi kawngah hian mawh an phur a ni tiin Khanpui leh Lailak khaw mipuite chu neitu rilru pu chunga RD hmalakna te lo vil zui zel turin a chah a ni.
Lalruatkima chuan Rural Development Department-in thingtlang mipuite hmasawnna tura kawng hrang hranga hma a lak dan pawh a tarlang a. RD hnuaia scheme hrang hrang NI 100 inhlawhna MGNREGS te, PMKSY te, MzSRLM, PMAY (G), SPMRM etc te hmangin thingtlang mipuite hmasawnna tur leh eizawnna tur siamsak te chu thingtlang mipui ten an chhawr tangkaiin a takin hma an sawnpui nasa hle a ni, a ti a. Heng scheme tam takah hian mipuite tawiawmna tha avang leh Department hotute thahnemngaihna avangin Mizoram chuan state dangte aiin hma a la tha tih a tarlang a ni. Sawrkar hi mipui tawiawmna tel lovin a kal thei lo va, mipuite pawhin sawrkar hi ka ta a ni tih rilru pu in sawrkarin mipui hmasawnna tura hma a lakna ah tawiawm ila Minister chuan a ti a. Covid harsatna karah sawrkar, kohhran leh mipui te tanrualna avangin hripui lakah Mizoramin tun hun a thlen theih phah hi a lawmawm ka ti tak zet a ni, tiin a sawi.
Project hawnna inkhawm hi R. Lalthazuala MCS Director Rural Development Department in a kaihruai a. A.Chhalai, Executive Engineer RD Deptt in technical report pe in project enkawl zui zel tura din, Project Managing Committee Chairman Pu Benjamin Zalawma BDO Phullen hnenah project hi a hlan nghal a ni.
Springshed Development & Water Supply for Chalfilh Catchment Area project hi kum 2017 ah NABARD ah thehluh a ni a, kum 3 hnu ah kum 2020 khan NABARD in a pawmpui a, ni 10.2.2020 ah thawh tan niin ni 16.10.2021 ah zawh a ni a. He project hi tui lakna tur ngawr ngawr tinzawna duan ni lovin Chalfilh tlang leh a chhehvel ramngaw chereu zel tur veng a, tuihna tuaithar leh tihpun lehna tur atana ruahman a ni a. Chalfilh Catchment Area chhunga khaw 3 – Hmunnghak, Lailak leh Khanpui khua te chawmna turin Chalfilh tlang sang atangin GI Pipe hmanga tui lak a ni a. Tui litre 6000 dawng \heuh Zonal tank 10, Khanpuiah 5, Lailakah 3 leh Hmunnghakah 2 dah a ni a. Tui khawlna tur zem lian litre nuai 3 dawng theuh, Khanpuiah 2, Lailak leh Hmunnghakah 1 ve ve 2 bakah Lailakah litre nuai 2 dawng 1 dah a ni bawk.
