Vaivakawn Thlanmual kaltlanga Zohnuai veng atanga NH 54 panna kawng chu tukin zing khan I&PR Minister Pu Lalruatkima’n a hawng.
Minister Pu Lalruatkima chuan Vaivakawn Local Council hruaitute, NGO hruaitu leh midang tukin a lokal khawm te chibai a buk a. Vawiin ni ah lawmna tak mai kan tawng hi a phurawm a, he kawng lo chhuah dan te a thuiin kum 2018 ah Vaivakawn thlanmual a chim a, khawtlang kan rum a, chung harsatna te hriain PWD ten hma minlak puiin National Highway atangin retaining wall siamin, hun lokal zelah kum 2020-ah Hunthar lei tla hniam nidanga kan hriat ngailoh lo a thleng a, PWD changtu kan Chief Minister Pu Zoramthanga hnenah ngenin hmalak a ni a, vawiin kawng hawn hi mipuite leh khawtlang hruaitute tawiawmna azarah puitlin a lo ni ta a ni a ti a. Kawng a lo puitlin theih nana mimal ram neitu ten khawtlang mamawhna te chhangin an ram te kawng siam nana pe in, tiang chuan mi inphal tak tak te tello chuan he kawng hi a siam puitlin theihloh a ni a ti a.
Minister leh Bialtu MLA nibawk Pu Lalruatkima chuan Covid hripui len hma deuhin Vaivakawn atanga Bazar Bungkawn kawng tha mawh em em leh kum tin deuh tawh resurfacing tih ngai thin chu, sawrkar in rigid payment min siamsak hman chu lawmawm a tih thu leh kawng inkalpawhna chu hmasawnna atana rahbi pakhat a nih avangin mipuite pawn a enkawl leh a hmandanah fimkhur a uluk taka neitu chan changa mawhphurhna la turin a ngen a. Dan in a phalloh thil te tihloh leh bawlhhlawh paih thleng pawh a fimkhur a tul zia leh hemi kawnga hmasawn ngai kan nih thu a sawi bawk a. Sawrkar hmalakna ah hian mipui kan tel ve tih hre tharin vawiinah Zohnuai atanga NH 54 kalpawhna hi mipuiten tangkai taka an hman theihnan lawm takin a hawng tih a sawi.
Bialtu MLA Pu Lalruatkima hi AMC Deputy Mayor Pu R. Thanglura leh midangten an tawiawm a. He hun hi AMC Councillor Pu Lalfakzuala Chenkual in a kaihruai a, he kawng hlawhtlinna tura mimal ram petu te hnenah leh bialtu MLA Pu Lalruatkima hnenah lawmthu a sawi a. SE, PWD Er. Lalchhuana hnen atangin ngaihthlak a ni bawk a ni.
He Project hi cheng nuai 166.77 siam a ni a, Phase I hi March ni 10, 2021 ah khan zawh fel a ni a, Phase II hi September ni 19, 2022 khan zawh fel a ni. A kawng thui zawng hi 400Rm vel a ni. Kawng chhuk lai hi ‘1 in 3’ vela sang a ni a, motor te kal theihna tura siam a ni bawk a ni.
