Justice Nelson Sailo, Gauhati High Court Judge, Lunglei Judicial District Portfolio Judge ni bawk chuan vawiin khan Lunglei District Court tlawhin, District thuneitu te kawmna hun a nei.
Lunglei Judicial District chhungah hian District pali – Lunglei, Siaha, Lawngtlai, leh Hnahthial District te a awm a. Justice Nelson Sailo hian District Court Lunglei hmunhma leh a tihchangtlung theih dan tur te leh case awm mek te a endik a. District Legal Services Authority leh Juvenile Justice Board hnathawh te a endik bawk a. District Court ram a hmalak dan tur a en bawk a ni.
District Court endik zawhah Justice Nelson Sailo hian Circuit House ah District pali Lunglei, Siaha, Lawngtlai leh Hnahthial a Deputy Commissioner, Superintendent of Police, Assistant Commissioner Of Excise & Narcotics Department leh Superintendent of Jail te dan leh hrai kenkawh kawnga hnathawh dante leh jail tihchangtlun theih dan tur te a sawipui a. Court case chak zawka kalpui a nih theih nana thawhhona tha a pawimawh thu te pawh sawi a ni. Court hmunhma tihthatna hmalak mek thawktu Contractor te leh bialtu Engineer te kawmna hun a nei bawk. Hei bakah Lunglei Judicial District chhunga Judicial Officers’ te kawm bawkin, rorelna dik mitin tana ban phaka a awm theih nana case chak zawka kalpui dan te leh hmalakna te sawiho a ni.
