Vanglaini editor hlui K Sapdanga leh joint editor hlui Lalnghinglova Hmar (Tetea Hmar)-te chuan April 11, 2019 (Lok Sabha MP inthlanni) chhuaka tihsual palh an neih avanga an thubuaiah thiam an chang.
Vanglaini hian MNF party symbol an tisual palh a, an website lamah ngaihdam dilna an chhuah nghal bakah, MNF candidate bakah MNF hruaitu thenkhat hnenah thupha an chawi nghal a ni. Khatih laia chief minister Zoramthanga, MNF president chuan Vanglaini chuan an tihsual palh ni loin, tihluih niin a sawi thung.
He thil avang hian Vanglaini editor hlui K Sapdanga leh joint editor hlui Lalnghinglova Hmar-te chu thubuai siam sak an ni a, court-ah tum eng emaw zat an in lan. MLA inthlan hnuhnung ber campaign lai pawh khan an pahnih hian dan-in a phut angin chanchinbu leh TV lamah thubuai an neih thu an chhuah.
An thubuai hi hun eng emaw chen ngaihtuah a nih hnuah nimin khan court chuan thutlukna a siam a, police chhuina leh thuhretute thusawi a ngaihthlak hnuin K Sapdanga leh Lalnghinglova Hmar-te hi thiam a chantir. Court chuan tihsual luihah a ngai lo a ni.
