Rajya Shabha MP K.Vanlalvena chuan nimin khan Zemabawka Mizoram State Cancer Institute-a tlawh a. MSCI hmasawnna chi hrang hrang leh hna thawh hmabakte a hmunah a enfiah a ni.
K.Vanlalven chuan, MP hmasa, Union Health Minister ni bawk Pu Dr.C.Silvera’n Cancer hemna khawl Mizoramah min lo bun sak kha kan ram tana thil hlu tak leh chhuanawm anih thu a sawi a. Khawl thil anih avangin a lo hlui tawh a, a thlakna turin khawl tha zawk leh changkang zawk Mizoram sorkarin a bun thei ta hi hmasawnna ropui tak a nih thu leh lawmawm a tih thu a sawi. Cancer Hospital-ah hian damlo te veivahna tur patient lift an la neih loh avangin MP K.Vanlalven chuan siam sak a tum thu a sawi nghal bawk a ni.
Dr.Jeremy Lalrinsanga Pautu, pawhin thusawiin Mizoram hi cancer tamna ber a ni a, dan hre mi thlengin court-a min khing hialna kan ni. Chuvangin, helai hmunah hian khawl tha tak tak dah tur pawh ruahman mek zel a ni a, a then phei chu a chhe tawh a, tun kan sorkar thar hian khawl tha tak min pe hi kan lawm em em a ni, a ti.
Mizoram State Cancer Institute(MSCI)-ah Pet-ctscan taksa pum en theihna tur room pawh peihfel ani tawh a, a khawl hi a rawn thleng tep tawh a, he khawl hian taksa pum, chhungril lam thlengin cancer vei leh veiloh a en theih dawn a. Pet-ctscan hi Mizoram a awm loh avang hian nitin deuh thaw phaiah mi za rual vel damlo an kal a ngaih phah a, he khawl bun fel hunah chuan sum tam tak senga phai kal ngai lovin in entir theih tawh dawn a ni.
MSCI-ah hian Linear Accelerator -Inhemna khawl, Brackytherapy – chhunglam hemna, CT Simulator/CTscan-te a awm a. Tin, Cobalt therapy (Equinox So) – pawnlam hemna Atomic Energy Regulatory Board (AERB) pawhin phalna an pek tawh pawh hman theih tep tawh a ni.
