MNF party-a an General Secretary VLKroshnehzova chuan vawiin khan Aizawl Press Club-ah chanchinthar lakhawmtute kawmin, “Inthlanpui kum kan lo thleng leh ta a, Party hrang hrangte pawh kan insingsa leh mek a. Inthlan hmachhawn turin kan thiam leh theih ang angin kan inbuatsaih mek a. Hetiang a nih lai hian MNF Party chuan hmasawnna duhawm tak a nei mek zel a. ZPM, Congress bakah party tenau dang leh neutral atangin nitin mithar duhawm tak tak MNF zawm thar kan neih belh zel a. Sorkar leh ngei turin MNF chuan hmalam a pan zel a, Zoram mipuiin ka CM zahawm tak Pu Zoramthanga kaihruai Mizo National Front chu sorkar leh tir an tum tih a lang chiang ta hle a ni,” a ti.
VLKroshnehzova chuan, “MNF party chuan Dt. 25.5.2023 atanga Dt. 7.7.2023 inkar chhung ringawt khan Zoram hmun hrang hrangah Congress, ZPM, BJP leh neutral atangin voter 10757 kan lawmlut a ni. Lawmluhte hi fimkhur taka dik thei ang ber tura Hnam Run Publicity Department-in kan chhinchhiah an ni. Congress, ZPM leh BJP-a beidawngte hnam party-ah an rawn haw khawm mek zel a. Heti taka MNF party-in bawh a hlawh hi MNF sorkar-ah mipuiin rinna an nghat tih a lang chiang a. MNF President leh Chief Minister ni bawk Pu Zoramthanga chungah mipuiin rinna an nghah zia a lang chiang hle.
“Hetianga MNF Party-in hma a sawn mek zel lai hian Congress Party leh ZPM chu an buai tak zet a. An party bansan an intih hmuh nasa hle.
“Tunhnai chhoah Congress Party chu an Treasurer Pu Zodintluanga MLA-in a nihna a bansan a, an president hnenah na takin a ban chhan lehkhain a pek bakah zau takin a thehdarh a. An PAC member Pu KS Thanga, ex Minister of State pawhin Congress party atanga banna a thehlut a. A banna thehluhah hian sawihlawk tak thamna sum inpek chungchang a sawilang nghe nghe.
“Pu KS Thanga ban hnu hian Mizoram hmun hrang hrang atangin bang thawm a ring hle a, an chauh sa tawh nak alaiin Congress bansan an thahnem hle a. An President Pu Lalsawta’n Congress ni turin duh bik leh thlan bik a nei a, an President duh bik leh thlan bik ni lo tan Congress-ah hmun a awm meuh lo. Tuna Congress hruaitu lian tak tak Congress Party-a la awm hram hramte pawh hi MLA ticket chang lo tur chiang sa te an ni hlawm a. Nakuma an inthlan huna an President Pu Lalsawta paih theih a nih beiseia a der maia la Congress hram hramte an ni. Congress leh an hruaitu tharah mipuiten beisei a nei tawh lo a ni.
“ZPM lah nise an hotute-ah inrem lohna leh ngaihdan inan lohna a nasa em em a. An hotuten duhsak hrang theuh an neih avangin an duhsak zawng theuh haivur nan an party dan pui (constitution) meuh pawh an mahni ngeiin an bawhchhe duh a ni. Mahni party chhung pawh rel fel thei lo, mahni dan siam ngei pawh mahni ngeiin bawhchhe duh hian rorelna fel an kalpui lovang tih a chiang hle a. An nihna kalsan chuang lova hming thar invuah, beram vun sin a fing taka chinghne khawsa ang vel an ni.
“Social Media-ah an hotute an inbei ul ul a, bial viltu an puang a, mitha leh thawkrimte aiin milar leh hausa, sum thawh hnem theite chawi vulin bial pek an ni a. Anmahni beiseitute beiseina a thamral ta a ni.
“Hetiang a nih avang hian ZPM chu an kehdarh ta mek a. Lunglei leh Lawngtlai lamah an bang chum chum a, Zoram hmun dangah kangkai zelin ZPM atangin an bang chum chum a. An party Executive member, Joint Secretary, Secretary mai bakah an rorelna sang ber dawttu Political Affairs Committee pahnih laiin banna an thehlut ta bawk a ni.
“ZPM hotute zingah an zawrh ber ‘kalphung thar leh mipui sorkar’ sawifiah thei an awm lo va. ‘Kalphung thar leh mipui sorkar kan zuar’ an tia, han zawt thui ila sawithiam leh sawi thei an awm lo a. Belhchian dawl lo leh thudik chanve hmang sorkar sawisel hi an kalphung thar tih chu ni beriin a lang. Hetiang a nih avang hian ZPM pawh a khi nasa hle a, darh huk thei dinhmunah a ding mek a ni. Kalphung thar zuartute kalphung hi a buaiin a nawi hle a ni.
“Congress, ZPM leh Party danga beidawngte leh neutral-te Pathian leh kan ram tan titu, hnam rilru pute fuamkhawmna, hruaitu tha leh rintlak awmna nationalist party-ah lo haw khawm zel turin kan sawm a. Kan dik tawk lohna leh kan tlin tawk lohna theuhte insiam tha chung zela Pathian leh kan ram tana rawngbawl puiah kan sawm a che u,” a ti bawk.
