Kalphung thar nei zing lutuk hi khawiah mah an sorkar ngai lo : Zoramthanga, MNF President

Aizawl, the 18th Oct. 2022 : MNF President leh Chief Minister ni bawk Zoramthanga chuan vawiin khan Saitual Auditorium-ah MNF Tawi East Block Conference chu khuallian niin a hmanpui a. Saitual DC office thar chu tun term chhung a hawn hman hram tum anih thu leh hawn hman loh deuh pawhin term tharah hawn anih tur thu a sawi.
Zoramthanga chuan sorkar kal lai mek chungchang sawiin, Central-in chhiah tling khawm atangin State-te an chanvo tawk turin a sem a, 2021-2022 ah hei hi Mizoram State ta tur, in budget tur a ni e, tiin kan hmuh tur ang kan hmu pha ta miah lo a, kum 2021-22 chhung khan cheng vbc 2600 atang a cheng vbc 2700 bawr vel kan hloh a ni, tax kan lak ve tur covid avanga kan lakloh hi cheng vaibelchhe 3000 vel niin ka hria a, kan harsa em em a, hetiang chung hian sorkar hnathawkte hlawh kan la pe thei a, ‘damlo na tak, kal thei tawk tawk, tiang hawl chung talin kal rawh’, min tihna ang vel a ni, a ti a. Kum 2008-2018 Congress sorkar kha tibuaitu awm miah lo a kal, zu zawrh avanga chhiah tam tak la bawk si nen khan min han teh khin a, a kar hla em em a, amaherawhchu, Pathianin khang zawng zawng lo thleng tur kha a hre reng a, ZPM a thlang lo, Congress a thlang lo, keini MNF-te hi min thlang a, a hah pawh kan hah hle a ni, a ti. Finance Minister ni bawk chuan, thenkhatin Finance Minister CM hi bang rawh se, an han tizui a, a hmaa sum ngah chawm bawk hawp bawk nen chuan kan inang lo a, vahrit leh chepa hi khaikhin luih tlat chi a nilo a ti.
MNF President chuan, “Tunge a dawt leh hian sorkar ang tih chuan MNF varparh arsi hi a eng zual zel a, kan MLA te hi a mal buk buk chuan a tling tawh lovang kan ti thin, amaherawh chu Congress-in tunge an rawn Candidate dawn ZPM-in tunge an rawn Candidate dawn tih hi ngaihtuah zawk tur a ni. MNF chuan bial tinah kum khat a la awmchhung hian a enkawltu tur dah vek kan tum a ni. Official-in tumah kan la puanglo a, MLA kan neihlohna bial 12-ah pawh enkawltu/hotu tur hi ruat vek kan tum a, chutiang chuan MNF hi inthlan leh hun a tan kan inbuatsaih mek a, party dang han en ila, an hotute pawh an kual mai mai hrih a ni,” a ti.
SEDP chungchang sawiin, kumin chhung hian chhungkaw 60,000 hnenah Rs.50,000/- pek vek kan tum a ni, a ti bawk. MNF President chuan, MLA 30 hi a tlem berah neih kan tum a, ZPM hian under 10 an neih ka ring a, Congress hian pahnih khat an neih loh chuan an artelukawn ang, a ti a. ZPM te phei chu kum 36-40 kal ta vel atanga an hotuten politics an buaipui tan tawh kha a ni a, a khat tawkin kalphung thar an nei a, kalphung thar nei zing lutuk hi khawiahmah an sawrkar ngailo a, mipui pawhin pawl sawn zing lutuk, kum 36 leh tihchhunga pawl 10 zet sawn thin, tui anga nghet lo hi chu an ring lo a, MLA 10 an la pe tling ngai lo a ni, a ti.
MNF President chuan, ZPM chu an constitution-ah pawh awmlo hruaitu an nei a, MNF erawh Pathian leh mipuite zarah a nghet tulh tulh a, thenkhat chuan hman atang tawhin ‘min en chhin ve rawh u’ an ti tawh, mahse, mipuiin an la chhin duh lo a party nghet lo, Rimenhawihi ang maia ‘hming lem ka neilo’ ti reng mai hi zoram mipui hian an hrechiang a, enchhin an tum lo a ni, a ti. MNF chu pathian leh mipui zarah sorkarna siam leh turin min buatsaih a, keini pawh kan inbuatsaih leh a ngai a ni. Politics-ah hian dawhtheihna a pawimawh em em, a changin mangan tawpin, a changin harsa tawpin kan awm thin, a tawpah pathianin min hum a, min tanpui leh thin a ni, varparh arsi hi a eng zual zel dawn a, kan Pathian hian kawng chanveah min kalsan dawn lo, kan ram leh hnam hruaichhuak turin pathian leh kan ram tan tih thupui a neitu kan nih hi i hre reng ang u, tiin kalkhawmte a chah a, MNF President Zoramthanga hian mithar, Congress, ZPM leh Neutral atangin voter 277 a lawmlut a ni..
Block Conference-ah hian khuallian R. Lalzirliana, Minister leh AMC Mayor Lalrinenga Sailo te pawhin thu an sawi a ni.