Vawiin April ni 27, 2022 (Nilaini) hian MNF Adviser, Dr.R.Lalthangliana chuan Mara Autonomous District Council (MADC) inthlan lo awm turah campaign-in New Siaha campaign office-ah thu a sawi a, College vaih-I campaign office thar hawng lehin Pu C.Ngocho, President Kissan Morcha, BJP leh Pu S.Mauli, MRP & CID pension leh an chhungte chu MNF-ah a lawmlut a. Zero point-a MTP Hall-ah thu a sawi leh bawk a ni.
Health Minister Dr R.Lalthangliana chuan, “Mizoram pum tan pawha zahpuiawm lo tak Siaha Hospital chu, in bialtu MLA Dr.K.Beichhia nen kan rawn hawng tawh a. Siaha-ah hian Health department lamah project lian tak tak, building tam tak sakna tur kan nei nual a, heng laia mamawh zawng zawng hi chu project-ah dahluh deuh vek kan tum a ni. Sub-Centre ho hi upgrade-in Health & Wellness officer awptir veka District Council Area-ah hian dah kan tum a, Quarters chhe lutuk tawhte pawh thuam that vek tumin hma kan la mek a ni. Covid vangin kum hnih zen zawn kan buai a, tun kan term chhung hi chuan hna thawhna hun tam tawh lo mahse; theihtawp chhuaha hna tam thei ang ber thawh kan tum a ni,” a ti. Dr.R.Lalthangliana, H & TE Mnister ni bawk chuan, “A hminga H & TE Minister ka nihna zawnah Siaha College-ah Science zirtu an la awm lo in neih theihna turin sum dinhmun en pahin theihtawp rawn chhuah ka tum a ni,” a ti.
MNF Adviser Dr.R.Lalthangliana chuan, “LADC-ah seat 25-ah seat 20 kan la a. Helai MADC-ah hian tuilet hnua kan beih ngai loh BJP kan bei ta a, a hma kha chuan Congress kan bei thin a, helaia Congress leh BJP-te hi a mihringa thuhmun vek an ni a, danglamna an awm lo. Kan sorkar kum 3 leh a chanve chhung hian inthlanna tum engemaw zat kan hmachhawn tawh a. MP(LS)-ah hnehna changin, kan la sorkar ngailohna Sinlung Hills inthlanah kan sorkar a, VC thlanah 80% chakna kan la, MLA hovin MP (RS) kan candidate kan thlangtling a, LADC-ah majority kan lak ngai lohnaah kan la a, Chakma District Council-ah hnehna kan chang a. MLA bial 11 awmna AMC inthlanah hnehna kan chang leh a, Local Council 80 chuang awmnaah 80 deuhthaw kan la, Tuirial bial MLA bye election-ah hnehna kan chang leh a, tun inthlanah pawh hian Pathian tanpuinain hnehna kan chang leh dawn a ni. In bialtu MLA, Dr.K.Beichhua, Minister hi mi fel tak leh chak tak mai a ni a, a hmalakna hrang hrangte hi a thain a chhuanawm khawp mai,” a ti.
MNF Adviser Dr.R.Lalthangliana chuan, “MADC-ah hian Congress ngar ngar a la sorkar a, BJP a sorkar leh a, an thuhmun reng a ni. MNF Sorkar hi min han enchhin ula, a dang zar mai ang. MADC-ah hian kan member-te in lo thlangtling a nih chuan bial chhungah thuneihna sang tak kan pe lo thei lo, kan aiawha in thlantlinte an nih avangin Aizawl atangin thil engkim kan rawn tih a rem lo ang a, anmahni thuneihna kan pe dawn a ni. Kan candidte-te in thlantlin chuan thuneihna sang tak state sorkarin kan pe ang. SEDP lama thuneihna leh helam hna hrang hrang awmah thuneihna kan pe bawk ang,” a ti bawk.
