Aizawl, April 4 : Vawiin khan ZPM Chhung Inkhawm neih a ni a, he hunah hian Pu Lalliansawta, President chuan thu a sawi a; tunhnaia Mizoram hmun hrang hranga zin report ngaihthlak a ni bawk.
Pu Lalliansawta chuan mi thinlungah ZPM-in hna a thawh nasat thu sawiin, “Zoram hmun hrangah kan feh chhuak a, a thlawnin tumah kan haw lo. Hmun tinah lawmluh tur an awm a, kan thawhrimna a thlawn lo. Pawl boruak a tha a, thahnemngai taka thawktute chungah lawmthu ka sawi a ni. Kan hma lawkah Lunglei Municipal Council (LMC) leh Mara Autonomous District Council (MADC) inthlan kan hmachhawn dawn a; hemi atan hian General Headquarters-in nasa takin ngaihtuahna a seng a, chakna chang ngei turin hma a la a ni. Heng inthlan chungchang buaipui tur committee hi din a ni tawh a, kan candidate tur te reng reng hi Headquarters-in a ruat tur leh thutlukna a siam tur a ni. Kum 2023 MLA general election lo awm turah pawh Headquarters-in candidate tur mi tha tak tak a ruat dawn a, Party mi te chiai lo tur leh thu lengvak mai mai buaipui lo turin ka duh che u a ni,” a ti.
Hmun hrang hranga zin chhuakten report pein, Zoram hmun hrang hrangah ZPM zawm thar mi thahnem tak an awm thu leh zawm tura inkau mi thahnem tak an awm mek thu ngaihthlak a ni a. Kan sawrkar hrawn tawh te-ah mipuite an beidawngin ZPM chu an innghahna leh beiseina awmchhun a nih thu an sawi bawk a ni.
