BJP Mizoram chuan vawiin 5th June, 2023 (Monday) 11:30 am hian Karthar Inhlanna hun leh Political Session hun neiin, Johny Lalthanpuia, State Media Convener-in inkhawm a kaihruai a. Vanlalhmuaka, State President-in thusawina hun a nei bawk.
Vanlalhmuaka chuan, “Mizoram-in Economic Independence kan mamawh a, Political Independence chu India ramin British lak aṭangin kum 1947 ah kan hmu tawh a, vawiinah hian ‘Economic Independence’ ei leh bara intodelh a, State dangte rinchhan ngai lova, mahni kea din theih hi kan mamawh ber a ni. Nimahsela vawiina kan Sorkar hrawn mek te hian Economic Independence/Ei leh bara intodelhna hi kan buaipui ngai lova, Mizoram Econmomy chu nasa takin a chhia a, thingtlang leh khawpuiah pawh kan Econmomy hi a ṭha lo hle tih hi a chiang a ni,” a ti.
Vanlalhmuaka chuan sawi chhunzawmin, “India ram chuan kum 2014 aṭangin Economic Independence, ei leh bara intodelhna leh retheihna lak aṭanga zalenna kan hmu chho a, mi rethei tam tak te’n mahni kea din theihna turin BJP Sorkar chuan nasa takin hma a la a ni. Tunah hian India ram chu khawvel ram hausa ‘economy lian’ ber pangana (5-na) a ni tawh a, India rama retheihna um bo turin Pu Narendra Modi Sorkar chuan nasa takin hma la in, thlingtlang khaw kilkhawr ber thlengin, chhungkaw tin mamawh thlensakin, chu ngei chu Mizoram ah pawh thlentir kan tum leh kan duh chu a ni a, chutianga retheihna lak a ta chhanchhuahna kan chan theih nan BJP hi Mizoram ah kan Sorkar a ngai a ni. A chhanchu Mizoram ah PMAY kaltlanga mi rethei in sakna tur sum pawh Central aṭanga a vaia kan hmuh tawh laia, 40 % bawr Mizoram Sorkarin mi retheite in sak nana an hman laiin, State dang te’n PMAY kaltlanga mi retheite in an sak 100 ah 100 an hman tawh a, Sum awm reng si a hun tiam chhunga hma la thei lo Sorkar kan hrawn ringawt te hi Mizoram mipuite hian hengte hi kan hriata kan hnawl ngam a ngai a ni. Kan chanvo chan tur min eisak tu te hi kan hnualsuat a ngai a ni,” a ti bawk.
