Marpara: 6/4/2022: Congress Party Treasurer Pu Zodintluanga Ralte, MLA chuan a bial fan chhunzawm zelin, nimin 5/4/2022 khan Marpara South-ah Congress zawm thar mi 64 a lawmlut. Lawmluh zingah hian VC Vice President a tel a ni.
Marpara South, Terabonia, New Sachan leh Mauzamahte public meeting nei zelin mi thar a lawmlut nghal zela Pu Zodintluanga chuan, kum li a ni dawn tawha vawiin thlengin mipuiin cheng khat pawh an la dawn loh thu a sawi a, “Mizoram pumah mi rethei mi harsa zawk chhanchhuahna programme pakhat mah a la awm lo,” a ti a. “Central atanga pawisa lo kalte khawnge an hman ni ang. Mirethei zawkte in sakna installment pawh an pe thei tawh lo a ni,” a ti bawk.
“Tunah kum li dawn an sorkar tawha beisei tur an awm lo a ni. SEDP hi an tlin puia mahse an tlakpui leh dawn a ni, a chhan chu tumah cheng nuai thum an pe lo tlat a ni,” a ti bawk.
Chief Minister Pu Zoramthanga chu a sawi loh ang zela awm a nih thu CLP Leader chuan sawiin, “Kan Chief Minister hi a sawi loh dan zela awm a ni a, Congress an arte lukawn dawn MLA 30 kan la dawn a ti a, Congress kan tling dawn tihna zawk a ni. Chuvang chuan pawl danga lo awm tawh zawng zawngte pawh Congress party-a lo awm leh turin ka sawm vek che u,” a ti.
“Politics hi invauna tur a ni lo a, intihtheihna tur a ni lo a, mi harsa zawkte dawmkanna tur zawk a ni. Mipuite an vau a nih chuan keimah min vauah ngai rawh se,” tiin Pu Zodintluanga a bial mipuite thlavang a hauh thu a sawi.
“Congress party hi sorkar leh turin kan inpuahchah mek a, mi zawng zawngin mi dik corrupt lo an tih pu Lalsawta kan zuar a ni.
Mizoram sorkar sum leh paiah a tlachhe em em a, khatiang kha Congress sorkar laiin a awm ve ngai lo a, sum dinhmun a thaa mitinin kan chhawr a ni,” a ti bawk.
Pu Zodintluanga chuan, “Sorkar awmze nei lo, mipuite hian kan hrawn a ni. Sorkar tha lo hi a rang thei ang bera kan paih a ngaia sorkar tha kan din leh a ngai,” tiin a sawi.
