Nizan August ni 24, 2022 khan Pu K Sapdanga, ZPM Working President hova khawchhak tlangdung fanga fehchhuak mekte’n Farkawn YMA Hall-ah Vantlang Inkhawm an nei. He hunah hian Pu K Sapdanga, Pu Thangkhuma PAC Member leh Er. Lalhmingliana, General Secretary ten thu an sawi a, Pu T. Raldothanga, Adviser, Farkawn Group ZPM-in inkhawm kaihruaiin, Upa K. Lalzabiaka’n hunserh a hmang a ni.
Pu K. Sapdanga, ZPM Working President chuan, “Kan hmaa sawrkar tawh ten ngaihpawimawh leh tum bik, flagship an nei thin a, keini pawhin kan nei, kan flagship chu Mipuite hi an ni, mipuite hi kan khai chhuak dawn, a hmanrua policy pawh hmanni lawkah kan tlangzarh tawh a, policy kha kan kawngzawh (road map) tur chu a ni,” a ti bawk.
Pu Sapa chuan, “Diklo taka thiltih tam tak kan hmuh te hian politics tualzawlah min tir lut a ni. Kristian state-a roreltute hian Kristian angin ro kan rel em? Thuneitute’n khaw engah dan an palzut a, tuna kan kal danah hi chuan dan hian mu leh mal a nei lo a ni ber; heng zawng zawngte hi ZPM sawrkar hunah a reh ang. Party awn bik nei lo Mizo mipui tam tak (Neutral) ten sawrkar turin min duh a, min duhsak a, keini lam hi kan inpeih em tih i inzawt fo ang u, inpeih lohna lai kan neih apiang siamthain, Zoram tluchhe mek tungding turin tan ila sauh sauh ang u,” a ti.
Pu Thangkhuma PAC Member pawhin thu sawiin, “ZPM tana campaigner tha ber chu tuna kan Chief Minister hi a ni,” a ti a, “Kalphung thar awmzia hi, kalphung dik tihna a ni. Kha chen dikna rahbehna lak atangin kalphung thar, kalphung dik hi kan hmu dawn a ni. Chumi thleng tur chuan, thalai, nu leh pa, tlawmngai pawl leh Kohhran ten ke kan pen a ngai. Engtikah mah kan rama rawn Chief Minister lo tur, state dang Chief Minister it reng reng a mipui kan awm hi a va hrehawm em! Hawh u, i tangrual ang u,” tiin kalkhawm mipuite a sawm a ni.
Er. Lalhmingliana, General Secretary pawhin thu sawiin, “Zoram tana a tha ber pe turin ZPM hian hma kan hruai a ngai a. Thu lawilo leh puarpawleng mai mai a buai lovin, nun tak i dinpui ang u. Keini hi Mizoram entawn i ni ang u,” a ti bawk.
He hunah hian Pu BC Tawna, Secretary chuan inhmelhriattirna hun hmangin, Tirhkoh Zahmingthanga’n huntawp tawngtaiin kalkhawmte a tin a ni. ZPM hruaitute hian khawchhak tlang dung khaw hrang hrang- Samthang, Vaphai, Farkawn, Leithum leh Khuanglengte an tlawhnaah hian ZPM hruaitute nen inkawmhona nei zelin, political training an buatsaih thin a, vawiin khan Khuangleng khuaah political training neiin, ZPM East Tuipui North Block huam chhung atangin member thar mi 144, Pu K Sapdanga, ZPM Working President hian lawm takin ZPM-ah a lawmlut bawk a ni.
