Vawiin Nov 25, 2022 (Zirtawpni) hian PC Party chuan political training an nei a. Heta thusawitu PC Party President Vanlalruata chuan, “Mizoram sawrkar hi Ram leh Hnam Humhalh kawngah a hlawhchham a. Assam leh Tripura aṭangin ramri ah min nêk rengin, a nawr let ngam lova, hei hi a pawi em em a. Chumai bakah, kan chhehvelah a hnam ang a nêkna tawkin, Tripura, Assam leh Manipur-a kan unaute mangang au thawm kan tawk reng a. Chumai nilovin, Myanmar-a kan unauten harsatna nasa tak tawkin sahimna zawng a kan rama an lo tlan lut pawh sawrkarin hum ngam lovin an tana ṭha khawpin a chhawmdawl thei lova. Tun hnaiah Bangladesh a kan mite tharum a beiin, kan tan pawh aw a chhuah thei lova. Hei hi thil tlawmthlak tawpkhawk a ni. Keini chu sawrkar ila hei hi a thleng miah lovang,” a ti.
PC party chuan, “Bangladesh-a kan mi leh saten buaina an tawk hi kan pawmzam thei lova. Mizoram ah hemi avanga lo tlan luh tum te ramri a dan beh an nih avang hian Mizoram sawrkar hi kan dem a. Bangladesh aṭanga lo luh tumte an lo luh thuai theih nan leh a lo lut apiangten chhawmdawlna ṭha tak an dawn theih nan PC Party chuan Mizoram sawrkar kan ngen a ni,” an ti bawk.
