Vawiin ni 20.02.2024 hian Mizo Hnam Run inkhawm neih a ni a. Thusawitu Tawnluia, Sr. Vice President chuan MNF headquarters hruaitu inthlan tur chungchangah: “Party constitution ang chiahin kan kal,” a ti.
“MNF party chuan hruaitu term a tawp apiangin official nomination kan siam thin a. A duh tan floor atanga chuh theih a ni. (Chuhtu an awm avangin hmanah kan inthlang tawh). Floor atanga chuhtu an awm loh chuan official candidate-te tlingah puan thin an ni. Tun tumah pawh hian a duh apiangin floor atangin chuh theih a ni. Chuhtu an awm loh chuan RO-in candidate chhawp chhuahsate chu tlingah a puang mai dawn a ni, a ti.
Tuna kan official candidate-te hi Nomination Committee-ten kan aiawha an thlan chhuah a ni, tih sawiin, “Tun dinhmunah chuan Pu Zoramthanga uapna kan la mamawh,” tiin, “Ramri leh hnam issue-ah a hnathawh ang thawk an awm lo. Kum 15 lai chief minister lo ni tawh hi sulsutuah kan la mamawh a ni,” a ti.
Pu Tawnluia chuan official candidate-a a hming lang lo chungchangah, “Ka duh dan takin min telh tawh lo hi ka lawm a ni,” a ti a. “MNF chu Mizo hnam party a nih angin, ruling-ah awm lo mah ila Mizo nationalism champion-pui turin kan kal zel ang. Kan goal kan hlen chhuah hma chu kan kal zel dawn a ni, a ti bawk.
Thusawitu dang Pu J. Malsawmzuala Vanchhawng, Adviser MNF GHQ chuan ramri hung (FMR) chungchang a sawi a. MNF sorkar kha chuan central sorkarin nawr mah se hma a la duh lo. ZPM sorkar chief minister chuan ramri hung chungchangah Delhi a zin hnuah a thu a thlak niin a lang. NGO-ten FMR duh lohna lantira an punkhawm hial tawh laia ZPM sorkar chet dan hi chu a ngaihthat thlak loh, a ti.
ZPM sorkar thla hnih leh ni riat chhunga an hmalakna langsar tak chu chief minister office thuam a ni. An hmalak dan hi a mak hle, portfolio nei lo tura insawi kha tunah chuan CMO a tilianin a tichak hle tih a lang. Heng bakah hian healthcare bill leh thlai thar chungchanga an thusawite chu kan thlir chho mek a ni, a ti bawk.
