Kan pu ber Pu Zoramthanga – Congress, ZPM, BJP ten an beih vak vak hi politic kalphung pangngai a ni : Lalchamliana

Aizawl 28th July 2022 : Kulikawn YMA Hall-ah MNF Aizawl South II Block huaihawtin ‘Leadership Training leh Mi thar lawmluh’ program vawiin khan hman a ni a. Lalchamliana, Home Minister-in khuallian niin a hmanpui a. MNF Vice President Vanlalzawma chu Resource Person niin, Prof. F. Lalnunmawia, MLA-in a telpui bawk.
Khuallian Lalchamliana chuan mi thar 590 lawm lutin thu a sawi a. Party tihchakna chu grassroot levela sengkhawm hna thawh a ni, tiin Block hotute thawhrimna fak a. Ama bialah pawh hetiang ti ve tura thurawn pek a tum thu a sawi. “MNF party hi a din tirh ata tu ta mah a ni lo, a inti neitu apiangte tan a ni a. MNF hi Mizo zawng zawng lenna a ni,” a ti.
Tunlai issue chungchang sawiin: “Kan pu ber Pu Zoramthanga – Congress, ZPM, BJP ten an beih vak vak hi politic kalphung pangngai a ni. Hei hi eptu party-te tih dan tur a ni,” tiin Party mipuite chiai lo turin a chah a. Finance chungchanga an beihna sawifiahin, “India rama chhiah tlingkhawm insem zai (share in taxes) atangin Mizoram chuan kum khatah 0.56% chauh kan chang ve a. Thla khatah Rs vbc 230 vel a ni. Covid laiin Rs vbc 180 vel min pe. Grants pawh April 2020 atanga kum 2022 inkar, thla 20 vel chhunga kan hmuh tur, hmuh loh chu Rs vbc 2,600 zet a ni,” tiin, “Hetiang a nih vang hian sum harsatna a awm lo thei lo,” a ti.
Loan – NABARD, LIC, Market borrowing hi kan source pakhat a ni tiin, “Kan state thawhchhuah a pun loh chuan tu pawh sorkar sela puk lovin an kal thei bik lo ang. Tin, External Aided Project (EAP) atangin puk theih a ni bawk a. Tuna ADB loan Rs vbc 1000 lak turte hi budgeta mi ni lovin Central sokarin 90% a tum thin,” a ti.
“Sum hmuhna hlawm lian – Revenue (deficit) gap grant, sum indaih lohna chu Finance Commission (kum 5 zel atan) atangin a lokal thin. FC 14-na (2016-20) chhung khan Rs vbc 21,183 an rawn pe. FC 15-na (2021-25) atan Mizoram chan tur chu Rs vbc. 6,544 chauh dah a ni. “FC atanga sum hmuh a tlahniam tial tial a, hetiang karah hian tuin nge financial management thiam bik ang le?” Pu Chama chuan a ti.
Sum hmuhna dang – CSS chu India ramah an kalpui tha tawk lo thin tiin, “Tunah chuan RBI account luahlum tura dah thin Rs vbc 500-600 kha CSS atan pek chhuah a lo tul ta a. Tunhma pawhin kan nawmsak loh tehlul nen, tunah hian kan nuamsa lo zual a ni. CSS pawisa hi thil dangah hman phal a ni lova, kan account dinhmun luahlum turin dah thin a ni. Kan sum harsat chhan hi – a hnar atangin kan hmu tha lo a ni.”
“CSS, MR/Provisional Employee etc tel lovin sorkar hnathawk hlawh atan thla tin Rs vbc 400 vel pek chhuah a ngai a. Congress sorkar khan sixth pay atangin seventh pay an kalpui avangin hlawh atan senso a pun phah hle,” a ti bawk.
Tax Minister Pu Lalchamliana chuan kan sum dinhmun hi a ziaawm chho zel dawn nia finance hotuten an hrilh thu a sawi a. “SEDP pawh kan kalpui zel dawn,” a ti a. Chhungkaw 60,000 thlan chhuah atangin chhungkaw 30,000 hnenah Rs 50,000 pek phawt tur a nih thu a sawi bawk a ni.
He hunah Resource Person Pu Vanlalzawma, MNF Vice President hovin leadership training neih chhunzawm a ni a. Pu Zawma chuan inzir zel a pawimawh thu a sawi a. Tunlai khawvel thang zelah kum 10 zirtirtu nia a tawnhriatte a tawk loh dan te, social media hmang thiam tura tanlak a tul thu te bakah tihtur leh tih loh turte a sawi a. MNF hqrs hmalaknain block leh unit level-ah pawh IT & Publicity sub committee din vek tur a ni, a ti.
“Party dang nen inanna tam tak kan neih rualin MNF kan danglamna chu kum 60 chhungin harsatna tam tak hnuaiah kan kun a. Heng karah hian Leader pahnih nghet tak Pu Laldenga leh Pu Zoramthanga chauh kan la nei a. Hei hi kan ngelnghehzia tilangtu a ni,” Pu Zawma chuan a ti.