Dated Aizawl the 3rd March, 2025: Vawiin khan ZPM General Headquarters chuan Party Office ah chhung inkhawm an hmang a, thusawitu Rev. Dr.K. Thanzauva, Education Consultant chuan, kan rama Pathian ram a lo thlen tak tak hunah chuan Ei leh Bar, Zirna leh Hriselnaah hma kan sawn tur thu a sawi.
Rev Dr.K.Thanzauva chuan, “Khawi hmunah pawh Pathian ram thleng tur chuan Pathian chibai bukna, Dikna leh hmangaihna hruihrual pathumte hi a pawimawh hle a, heng thil Pathumte tel lo chuan Pathian ram hi a thleng thei lo a ni. Khawvela thil tha tih tum Capitalist, Socialist leh Communist te pawhin theih tawp chhuah thin mahse an hlawhtling tak tak thei lo. Keini erawh chuan kan ram siamthat nan, Ram rorelnaa Pathian ram tundin kan tum a, chu chuan ei leh bar, Zirna leh Hriselna kawngahte hmasawnna thar a rawn thlen ngei kan beisei tlat a ni,” a ti.
Pu Zauva chuan, “Pathianin ram min pekah hian thilsiam dangte nen kan khawsak thiam a ngai hle a, kan chhehvela thing leh mau, nungchate hi kan nunphunga bet tlat leh pawimawh tak an ni tih kan hriat thar a tul, kan environment kan dim loh chuan tuihna a kang ang a, kan thlai ei chhetu rannung an lo pung ang a, kan hriselna a lo tlahniam zel thei a ni,”a ti.
Education Consultant chuan, “India Society chu Pyramid Society a ni a, India ram hausakna 80% hi mi tlemte kutah a awm mek a, Pathian ram a thlenna hmunah erawh chuan PURUN Society a lo lang thin. Purun Society-ah chuan a chung zum angin mihausa tlemte an awm a, a hnuailamah a zung tlemte awm bawkin a lai a kiar a. Mihausa tlemte an awmin rethei an tlem a, mi vantlang an thahnem ber a, intluktlanna a lo thleng thin a ni. Aizawlah pawh hian Mizoram hausakna tam ber hi chu a awm niin a lang a, a ram pum huap ang hian zirnaah kan damtlang lo a, Health Care-ah kan dam tlang hek lo. Thenkhat Sitting room leh Office a nawm tawh em em laiin hei chen State kan nih hnuah ei leh barah kan la intodelh chuang si lo a, chuvangin Pathian ram thlenna hmanrua ni turin ZPM Party pawh hi din a ni a, kan maawhphurhna a sang hle a ni,” a ti.
Rev.Dr.K.Thanzauva chuan, “Kohhran pawhin Pathian ram thlenna tur hian tan kan lak a ngai hle a, Kohhran hi Pathian ram a ni lo a, Pathian ram thelnna tur hmanrua a ni. Thawhlawm kan thawh hnem em em a, chutih laiin Zirna, Hriselna leh intodelh kawngah hma kan la tawk lo niin a lang. Ngawi rengin kan Society-ah mipuite inkar a zau tial tial a, hlim leh lawm taka kan lam dual dual lai hian rethei leh hausa inkar hi a zau tial tial a ni. Roman Catholic Kohhranin nasa taka hma an lak avang hian kan la ziaawm zawk a, chuvangin Health Care, Education leh Economic-ah Pathian ram a thlen a tul a ni,”a ti bawk.
Pu Richard Vanlalhmangaiha, Lok Sabha MP pawhin thu sawiin, “Pathian leh mipui zara MP ka nih hnu hian Chanchin tha avanga Zofate kan vanneihna hi a takin ka hmu nasa hle a, India ram laili a khawsa kan tribal puite nunphung khu a lo la hniam ve hlawm khawp mai a, Zirna chungchangah leh kawng hrang hrangah Zofate min phak lo hle a, tribal ka ni tih pawh min hre lo fo a ni. Chanchintha dawng lo ila chuan vawiina kan dinhmun hi kan din phak ka ring lo. Kan thenawm State tribal hnam mipui tam tak neite pawh Statehood la nei pha ve lo an awm a, kan dinhmun hi min awt em em a ni. Kei ngei pawh Central Sorkar duhsakna ka dawng nasa hle a, Defence Committee member-ah hial min hlangkai a, MP zingah quarter chang lo thahnem tak an awm laiin duhsak takin Quarter nuam tak min pe bawk a ni. Kan ram tan theih tawp ka chhuah mek a, kan hmalaknate hi a hlawhtlin hmaa lo puan lawk hi ka hreh viau a, a hlawhtlinna erawh kan la hmuh chhoh zel ka beisei a ni,” a ti bawk.
