Vawiin khan Chief Minister Zoramthanga chuan Mizoram Finance and Account Service Association (MFASA) General Conference vawi 28 na Woodland Hill, Zonuama neih chu khuallian niin a hmanpui a, mi tinte hi kan ramin hma a sawn zel theih nana mahni zawn theuhva theihtawp chhuah tura koh kan ni, a ti.
Thusawiin khuallian chuan, Finance & Account Service Association chu pawl lian tak ni lo mahse ramin a mamawh tak sum leh pai enkawl thiamna nei awmkhawm a ni a, in pawimawh hle a ni. Tun hmaa Central in khauh angreng taka state sawrkarte sum leh pai hman dan tur a duansak kha a han thlah dul deuh a, state te anmahni remhriatnaa hmasawnna kalpui thei turin min han tizalen hlek a. Mahse covid19 hripui a lo thleng zui ta mai si a, hna kan thawhna tur sum leh pai min pek tur tam tak kan hmu thei lo zui ta a ni. Kum thum chhunga hmuh kan inbeisei kan hmuh leh theih tak loh kha Vaibelchhe 3500 chuang a tling a ni. Chutiang harsatna chuan min chim avangin kan beisei ang takin hna kan thawk thei lova, thawk thei ni ila chu tun kum nga chhung hian Mizoram hi sang takah kan awm ka ring a ni. Pathian zarah hun thate kan nei a nih ngai chuan kan rama resource awm ang angte haichhuak tam lehzualin; kan ram hi nasa taka chawikan theih a ni tih kan hmuchiang a ni, a ti.
Pathianin engkim that duhna ram min pea, ram ralmuang leh lehkhathiam tamna ramah min siam a, kan economy lam la tha tawk lo hi kan hmabak pawimawh a ni. Thei leh thlai lam kan tharchhuah tam a ngai a, transportation system tha kan mamawha, a lo sawngbawlna tur Processing System tha kan mamawh bawk a. Tin, kan thil tharchhuah tur pawh a hralhna awm ngei a nih a ngaih bakah kan tharchhuahten reilote chhunga India ram khawpui lian a thlen theih nan Lengpui Airport pawh thuam that chhoh zel a ni. Heng hmasawnna tura hmabak kan neih te hi chonaah ngaiin Finance lama kan mithiam te pawhin nangmahni zawnah theih tawp lo chhuah zel ang che u. Ram dangten an tih theih hi kan tihtheih lohna chhan tur a awm lo, rilru hmunkhat pua mahni zawnah theuh hma la turin kan zavaia koh kan ni, tiin kalkhawmte a chah a ni.
Inkhawm hi Pu Ramchuana, Vice President, MFASA in a kaihruai a, Pu Rosiamliana, ECM in hunserh hmangin Pu C. Lungmuanpuia, Secretary chuan report a pe a ni. He hunah hian kumina an member boral Pu Zokunga, Jt. Director of Account, PWD, sunna hun an hmang bawk. Chawhma inkhawm hi Pu Vanlalsawma, President, MFASA chuan lawmthu sawiin a khar a ni.
