Vawiin September ni 8, 2023 Zirtawpni hian Serchhip Kawnpui VC Hall-ah MNF Serchhip East Block ‘Political Training’ neih a ni a. He hunah hian Dr. R.Lalthangliana, Adviser, MNF General Headquarters leh Minister ni bawk chuan khuallian niin a hmanpui.
Dr.R.Lalthangliana chuan Sorkar pangngai, tluang taka an sorkar hun ang kha MNF term-ah hian a awm lova. Harsatna tinreng – Covid, Lirnghing, Vawkpul hri, ramri buai, kan unau raltlan tuam hlawm ngaite kan tawk a ni. India ram dangin an tawh loh kan buaipui hnem em a. Pathian leh kohhran, mipui leh sorkar tanhona vangin tun hi kan la thleng tawk tawk a ni. Hetiang ang harsatna tam tawk hi sorkar term khatah a la thleng ngai lo a ti.
Kan sorkar hi engmah ti mang lo angin an chhuah mai mai a. Serchhip chauh hi sawi ila- Serchhip College Administrative Building te pawh sak mek a ni a. Serchhip Hospital sak tharna tur Lungphum pawh kan phum thuai dawn a, Damdawi in lian tha tak in nei tur hi ka lawmpui che u a ni a ti.
Manipur, Myanmar leh Bangladesh buaina avanga kan unau harsatna tawkte thlavang hauha, dinpui tur hi chuan kan CM Pu Zoramthanga aia tling leh tlak an awm lo. Kan unaute tan kan ding zel dawn a ni. Harsatna an tawh laia sorkar tura min dahtu Chunglam khian hun tha min pe leh ngei ang tih ka ring tlat a ni a ti. Pathian khawngaihna vangin inthlan lo awm turah pawh sorkarna kan chelh leh ka ring a ti.
He hunah hian J.Malsawmzuala Vanchhawng, Adviser, MNF Gen. Hqrs.pawhin thu a sawi bawk a ni.
Vawiin MNF Serchhip East Block ‘Political Training’ hi Lalthianghlima, Block President chuan a kaihruai a. Zosangliana, Adviser, MNF Gen.Hqrs. leh Phairothanga, Adviser, MNF Gen. Hqrs ten thu an sawi bawk.
