Kan thutiamah kan dingnghet dawn : K.Sapdanga, ZPM Working President

Khawchhak tlangdung East Tuipui biala khaw hrang hrang fang tura fehchhuak ZPM Working President K. Sapdanga leh General Headquarters hruaitute chuan nizan khan Khawbung Zawlbukah political training leh mi thar lawmluhna hun hmangin, he hunah hian ZPM zawm thar, Zawlsei atangin – 28 leh Khuangthing atangin – 11 an vaiin mi 39 ZPM Working President-in a lawmlut. He hun hi East Tuipui South Block President TBC Laltlankima’n a kaihruai a. K Sapdanga, Working President thu a sawi.
K Sapdanga, Working President chuan, “Vawiinah hian kan ram chuan zan thim karah mangchhia mangin thawmri hriat nuam lo tak takte kan hre mek a, he kan mangchhia man mek ata kai harh a, kan ram siamtha turin ZPM chuan kawng dik leh him zawhpui tumin hmalam a pan mek a ni. Kan ram kaihhruai kan tum dan hi mi thenkhat chuan atthlak leh theih loh ni hial pawhin an hriain an ring mai thei, thawhrimnaa hmalam pan tura mipui kalpui hi harsa hle tura an ngaih vang a ni. Chu chu harsa dawn mah se kawng dik a nih miau avangin huai takin kan kal dawn a ni,” a ti.
ZPM Working President chuan, “Kan hmaa kal tawh party-te kal dan kan thlirin mipuite hnena kan chah duh chu, ‘keini hi chu kan thu tiamah hian kan ding nghet dawn’ tih hi a ni. Mipui ten kan laka beiseina sang tak an neih hi tihlawhtling turin kan theihna zawng zawngin kan thawk ang, tiin kan intiam nawn leh a, mi tin ten min lo chhinchhiahsak a, min lo pawmsak turin kan ngen a ni. Unit, Group, Block hruaitute leh member zawng zawngte pawh kan chah nawn leh duh chu, ‘keini pawl lehzel hi chu mipui tibeidawng thiang kan ni ve lo; chutiang tura harsa taka he party hi din a sual chhuak kan ni, mipui tan kan ding zel dawn a ni,” a ti bawk.
K.Sapdanga chuan, “He party hi sawipuitu nei ve lo, hotute hmelhriat ni ve lo, party tana inhmang ve lote tan belh tlak kan ni dawn, engvangin maw kan tih chuan, kan ram tan hmalam pan turin policy tha tak mipui huapzo kan neih avangin leh mi tin tan ZPM party chuan thawhrimnain hma kan lak dawn avangin ZORAM hi hmalam panin ke kan penpui ngei dawn a ni,” a ti bawk.
K.Sapdanga chuan, “Kan party hi party dangin buai leh inlungrual lo anga sawiin Pu Duha pawl, Pu Sapa pawl awmtir phet tumin, tute emaw hmang tangkaiin social media lamah te min bei nasa hle a, social media lama min beitu tam zawk hi mahni awmna veng unit tak ngial pawh hruai pha lo, mi inhlei ve satliah mai an ni. Chhang let tura Pu Duha te, kei te min beisei a, min phut thin hi a dik lo. Chhanlettir min tum hi a te tham lutuk. Hetiang ang party dangte dawt thu puarpawleng hi chu i nuih liam vel mai mai teh ang u. Kan hmalam chauh thlirin lungrual tak leh ?hahnemngai takin i bei zawk ang u,” tiin kalkhawmte a sawm bawk a ni.
He hunah hian General Secretary pahnih R. Lalchhuanmawia leh Er. Lalhmingliana ten kalkhawmte political training pein, J.Lalpeka, Khuangthing Congress hlun chuan lawmluh te aiawhin thu a sawi bawk.