Aizawl, March 28 : Mizoram Mathematics Society (MMS), Mizoram Science, Technology & Innovation Council (MISTIC) leh Department of Mathematics, Pachhunga University college tena kar khat awh tur pawl 9 leh pawl 11 zir zo chiahte tana chhiarkawp zirhona runpui, Mathematics Summer Day Camp, 2022, Pachhunga University College Mathematics Department-a an buatsaih chu vawiin khan Pu L.Thangmawia, Vice Chairman, HRD Board chuan a hawng.
Pu Thangmawia chuan zirlai tam tak ten Mathematics an hlauhna um bo tur leh zir belh duh ten an zir belh theihnana Mizoram Mathematics Society te thawhrimna chu fakin theihtawp chhuah chhunzawm zel turin a ngen a, a tih theih chinah theihtawp chhuahpui zel a tum thu a sawi bawk.
Pu Thangmawia chuan Mizorama Science leh Mathematics hmasawn nana MISTIC hnathawhte hi hmuhhmaih tum talh tan pawh hmuhhmaih thei a ni lo a ni a ti a. Science Society hrang hrang – MSS, STAM, MAS leh MMS te ngei pawh MISTIC zara hma nasa taka la thei an ni tih hi zoram mipui ten an hria a ni a ti a. Mizorama Science lam programme leh Science Journal zawng zawng deuhthaw hi an ni puihna zara neih thin a ni hi a lawmawm hle a, Tun hnaia he department hmalaknaa din belh, Patent Information Centre-te, State Climate Change Cell-te, Innovation Facility Centre-te, Scheduled Tribe Cell-te hi mipui tan an tangkai hle dawn a ni a ti.
Mathematics Summer Day Camp 2022 hawnna inkhawm hi Dr L.P.Lalduhawma, President, MMS-in a kaihruai a. Prof Rinpari Ralte, Head, Deptt of Psychology, Pachhunga University College chuan Life Skill chungchangah special lecture a pe dawn a. He camp-ah hian zirlai 59, class-IX zo chiah zirlai 24 leh Class XI zo chiah zirlai 35 an tel a, Mathematics an zir zelna tura pawimawh advance topic hrang hrang zir pui an nih bakah a duh tan Mathematics help Desk te siamin mahni duh ang zirlai tin ten a bik takin an zawt thei bawk dawn a ni.
