Mizoram khawthlang lama district khawpui Mamit chu Mizoram hmundang atangin a panna kawng pahnih Aizawl atangin NH-108 leh Bairabi atanga kalna kawngpui awmin, heng kawng pahnih te hi Fur ruahtui avangin a chhe hle a, tun dinhmunah heng kawng pahnih te hi lirthei te chi tan chuan kal hleih theih loh khawpin a chhia a ni.
Inrinni zan ruahsur nasa avang khan Aizawl panna National Highway 108 kawng thar, Dampui leh Dapchhuah inkar kawngpui chu a min a, chawlhni chhunlamah thenfai hnathawh niin, lirthei kal theih a thenfai a ni a, amaherawhchu ruahsur nasat deuh a leimin thei hmun tam takah ala awm a ni. Hetih lai hian NH 108 kawng thar Dampui leh Dapchhuah inkar kawng helna kawng hlui chu a chhiat nasat avangin lirthei lian chi a kal thei lo thin a, tunah hian lirthei tan thinna laite thawm that mek niin, lirthei lian chi kal theih tur a siam mek a ni.
Aizawl atanga Mamit panna kawng National Highway 108 ah hian kawng ko leimin hmun engemawzatah awmin, ruahtui tlak hleka kawng hnawh mai thei a nih avangin he kawng siamtute chuan hmun thenkhatah lei laihna khawl nen an vil reng a, hei bakah hian kawng chhuat bal tawh leh kawng chhuat bal mai thei leh tlahniam mek pawh a awm a, Bairabi lam atanga panna kawngpui hi a tam zawk chu lirthei te chi kal hleihtheih loh khawpin a chhe bawk a ni.
Hetianga Mamit khawpui panna kawng a chhiat avang hian nitin mamawh laluttu lirthei lian te chuan harsatna an tawk nasa hle a, ruahtui a tlak zel phei chuan nikhat thilthuah Mamit khawpui hi tlawhpawh thieh loha awm thei reng dinhmunah a ding mek a ni.
