Nizan July 26 (Inrinni) zan khan Kawnpui leh Sairang inkar kawngpui chhia leh chumi nghawnga lirthei leh driver tangkhangte harsatna sut kian dan ngaihtuahin ZPM Legislature Party informal meeting hmanhmawh neih a ni.
PWD Minister Pu Vanlalhlana kaihhruai meeting-ah hian Minister leh MLA 16 kalin Mizorama châk lakna kawngpui siam hna a kal chak thei lo leh, hemi avanga mipui tawrhna thleng mek chu pawi an ti a, hna hmanhmawhthlak thawh dan turte relin mipui harsatna a rang thei anga sut kian dan an rel.
ZPM Legislature Party ṭhu khawm chuan, lirthei tangkhangte a rang thei ang bera an chhuah theihna turin ruahmanna siam chhunzawm zel ni se, Home Minister-in a tih tur ṭulte lo ngaihtuahin Police lam pawh ṭhahnem zawk tirh luh ni se, an ti.
Lirthei tangkhang enkawltute hian ei leh in tur an tlachham tawh a, a rang thei ang bera ngaihven nghal tura tih niin DC, Kolasib kaihhruaia tangkhangte ei leh in buaipuina atan Rs.3,00,000/- pek chhuah chu Pathianni hian sem ṭan a ni ang a, Kolasib bialtu MLA Deputy Speaker Pu Lalfamkima’n a vil zui ang. Sairang lam hnaiha tangkhangte ei leh in tur pek chungchang Dr. Lorrain Lalpekliana Chinzah leh Pu Jeje Lalpekhlua-ten an enpui ang a, vawiin Pathianni hian sem ṭan nghal a ni ang.
Kawng siam ṭhatna atan lung (boulder) mamawhna a sang hle a, Mizoram pumah a lakkhawm theih dan kawng dap ni se, tiin an rel a. Tin, kawng chhiatna hmunah hian, PWD officials thuneitu sang chinin awm chilh se an ti bawk.
Tukin, Pathianni zing khan PWD Minister inah PWD hotu liante koh khawm an ni a, an hnathawh dan tura Mizoram sorkar duh dante hrilhfiah an ni; he hunah hian Minister te – Dr. Vanlalthlana, Pu F. Rodingliana, Prof. Lalnilawma; Advisers to Chief Minister – Pu Lalmuanpuia Punte, Pu TBC Lalvenchhunga leh Er H Ginzalala-ten PWD Minister an ṭawiawm a ni.
Zirtawpni zan leh Inrinni nileng leh zanah Supply Minister Pu B. Lalchhanzova’n a hmunah a kal chilh a, mipui nitin mamawhte a rang thei ang bera phurh luh a nih chu theih dan tur a lo enpui tawh bawk.
He kawngpui changtu NHIDCL-te dawr chhunzawm reng niin chak zawka hna an thawh theih dan turah ruahmanna siampui zel an ni a; Mizoram kawngpui pawimawh a nih avangin Chief Minister Pu Lalduhoma duh danin sorkar sum awm ang angin harsatna awm mek chinfel dan tur ngaihtuah chhunzawm zel a ni ang.
ZPM Legislature Party meeting chuan kawngpui siam hi nitin Minister leh MLA pahnih talin tlawh ziah turin an rel a, NHIDCL leh PWD-te hnathawh hi a hmunah endikin an vil ṭhin ang.
Mizoram châk lakna kawngpui hi NHIDCL-in rintlak leh ṭha taka an siam hi ZPM Legislature party duh dan a ni a, mipui tana harsatna lian tham a thlen tawh lohna turin PWD pawhin a ṭul ṭulah an pui ṭhin bawk ang.
ZPM Legislature Party hian he kawngpui pawimawh avanga harsatna a taka vil turin Crisis Management Committee an din nghal bawk a ni.
