ZPM Thalai chuan thuchhuah siamin, “Tun hnaiah Mizoram chak lakna kawng ber NH-306 & 06 chungchangah thu dik lo thang tam tak a awm a ni tih ZPM Thalai Headquarter’s chuan kan hria a, thu dik zawk ngaihven zel turin Mizoram mipuite kan chah duh a ni,” an ti.
Thuchhuahah chuan, “Ministry of Road Transport & Highway Minister Shri.Nitin Jairam Gadkari chuan 2023 khan Rajya Sabha Unstarred Question No. 748 a MP Pu K Vanlalvena a chhanna-ah chuan Mizoram chak lakna kawng ber National Highway 306 & 06 hi MoRTH chuan 4-lane a siam a tum avangin Pakage 8-ah a then a. Package 1&2 hi Assam area niin, Package 3,4,5,6,7 & 8 (Vairengte to Sairang) te hi NHIDCL Mizoram chan a nih thuin a chhang a ni.
“Bilkhawthlir -Kolasib, Kawnpui -Khamrang kawngte hi PWD NH Division –III in a enkawl thin a, Mizoram Sawrkar chuan chak zawk a kawng siam a nih theih nan, 28th May 2025 khan Chief Minister Pu Lalduhoma chuan MoRTH Minister chu meeting neihpuiin, MoRTH Office Memorandum C.No. 244614 chu 24th June 2025 khan chhuah niin, Point no. 4.2.2 Sanction of STMC Works on NH-54 ah chuan MoRTH chuan NHIDCL hnenah Vairengte to Sairang kawng hi a hmun a enfiah turin leh motor tlan thei tur a siam turin a hriattir a, he an hmalakna hi NHIDCL hian ni 15 chhung ngei a report pe leh turin MoRTH chuan a hriattir bawk a ni.
“MoRTH Thupek ang hian NHIDCL chuan Order chhuah atang a an deadline ni 15 (9th July 2025) chhung ngeiin hma an la dawn a ni tih hriain BJP President leh Siaha AC Bialtu Dr. K Beichhua chuan 5th July 2025 khan NH-06 hi a hmunah tlawhin, ‘kan dilnate ngaipawimawhin NHIDCL hian Monday (7th July) atang a hnathawk nghal turin hnathawhna hmanruate an chhawp nghal a’ tiin thu dik tawk lo hmang a Mizoram mipuite a hrilh hi ZPM Thalai chuan thutlingah a pawm thei lova, NHIDCL ten Kawnpui (km 118) leh Khamrang (km 133) kawng siamna tur hmun hrang hrang a bungrua an chhawp chhuak hi Mizoram Chief Minnister leh PWD Minister Vanlalhlana te hmalakna a ni tih chiang takin ZPM Thalai chuan Mizoram mipui hmaah kan puang duh a, MoRTH Minister Shri.Nitin Jairam Gadkari leh Mizoram CM Pu Lalduhoma te meeting rah-chhuak a par ve lo tum tawh lo turin BJP President thar hi kan chah duh bawk a ni.
“Ni 16 July 2025 khan MPYCC ten BRO leh NHIDCL te kawng enkawl mek Durtlang to Kawnpui, Kawnpui to Vairengte tlawhin, Mizoram CM Pu Lalduhoma leh PWD Minister Pu Vanlalhlana te chu bang tur a thuchuah an siam ta ngawt mai hi ZPM ?halai chuan thil inrem lo takah kan ngai a, NH-306 & 6 chungchangah Mizoram Chief Minister hmalakna aia BJP President Dr. K Beichhua fakna thu an chhuah hian Mizoram kawng enkawl dan chungchangah hriatna an nei tlem hle tih a tarlang tel nghal a ni. MPYCC te hian Mizoram a an Sorkar lai a Mizoram kawng an enkawl zawh loh zia leh kan kawngte a chhiat thin zia hre thar leh turin kan chah a, an Sawrkar lai a PWD Minister leh Chief Minister ni bawk Pu Lal Thanhawla’n beidawng tak chung a ‘Kawng tha lo hi vei vei mah ila tunbak hi a ngaih na a awm lo’ ti a Assembly House-a a lo sawi tawhte kha hre chhuak thar leh turin kan chah duh a ni,” an ti bawk.
