Vawiin April ni 17, 2022 khan NH – 302 Monitoring Committee for Tlabung ten Phairuangkai lei thawm ṭhat hna thawh mek leh Tlabung – Lunglei kawng siam hna thawh mek an tlawh a. Vawiina an hna en hi an ngen angin Phairuangkai NH – 302 Monitoring Committee hruaitu ten an ṭawiawm a ni.
NH – 302 Monitoring Committee for Tlabung chuan, “Phairuangkai lei hi kum 2020 khan a zapui pakhat a lo tliak tawh a, hei hian inkalpawhna nasa takin rei tak a tibuai a, khati ang kha a thlen leh a hlauhawm takmeuh a ni,” an ti.
“Lei siam ṭhat hi NH – 302 kawngpui sial thar hna thawktu NHIDCL (SRK Construction) kutah mawhphurhna hlan a ni a. Anni hian, tun hnai mai April ni 13, 2022-a lei zâpui pakhat chhe leh hi an thawm ṭha meka an hmanrua mamawh a la thlen rih loh avangin hna hi an la zo thei rih lo tih an sawi a.
“Ni tin, chawhruala lirthei 200 chuangin an zawh ziah Phairuangkai lei hi Lunglei district khawthlang lam mipui zawng zawng tan a pawimawh em em a, lei thar siam tuma ruahmanna awm mek mah se, hun rei tak kan rin a la ṭul dawn avangin a enkawl hna thawktu ten a thawm ṭhat hna leh a en zui hna uluk taka kalpui turin kan ngen a ni,” an ti.
Vawiin vek khan, “NH – 302 kawngpui sial hna thawh mek pawh en a ni a, kawng sialtu SRK Construction ten an hna hi thla khat (1) aia rei an thawk mumal tawh lo a, hna thawh hun chhung an neih thla 18-ah thla 6 dawn a ral tawh a, hna thawh hmasawnna erawh a tlem hle, vawiin pawh hian hna thawk hmuh tur a awm lo a ni. Khawthlang lam mipui te chak lakna kawng awm chhun a nih avangin hna hi a hmanhmawh thlak takzet a, fur ruahtui tlak huna kan harsatna tawh tur phei chu ngaihtuah ngam loh khawp niin kan hria.
“SRK Construction ten rora an herna hmun khat kan tlawh bawk a, hman tura an chhek khawl lung hi kawng siamna atana lung quality ṭha tak niin kan hre lo a, hei hi thuneitu ten en chianga a quality check nei turin kan ngen a ni,” an ti bawk.
