PC Party hruaitute chuan vawiin khan an Office-ah Mizoram kawng chhe chungchang an sawi ho a. “Kawngpui tha neih dan tur hi kan hria a ni,” Vanlalruata, President chuan a ti.
Kalkhawmte chuan, “Kawngpui kan nei tha lo pawi kan ti a. Sorkara thuneituten kawngpui chhiat chhan an sawi thin kan pawm lo a. Kan kawngpui chhiat chhan langsarte chu: eirukna te, kawng siam nana hmanraw hman that tawk loh vang te, sorkarin hna thawktu a ngam lo te, kawng siam thatna tur sum a tam tawk lo te ni-ah kan ngai a. Kawngpui tha kan neih theih nan sorkar huaisen leh a ngaihna hria kan mamawhah kan ngai a ni,” an ti.
Vanlalruata chuan, “Inthlan dawnin party-ten kawngpui tha kan tiam thin a, sorkarna changtuten kawngpui tha min pe leh thin si lo hi sorkar huaisen loh vang leh a ngaihna tak tak hriat thin loh vang a ni a. Kawngpui tha kan neih theih nan, department chhut danin, kawngpui enkawlna atan kum tin cheng vaibelchhe 230 vel kan mamawh laiin kawngpui enkawl nan cheng vaibelchhe 40 bawr chauh sorkarin a dah thin a. Hemi siam tha tur hian keini chuan a ngaihna kan hria a ni,” a ti.
“Tunah hian inthlan hmachhawn turin party-te kan inbuatsaih leh mek a, kawngpui tha kan tiam leh hlawm ang. Eng angin nge kawngpui tha nei tur chuan hma lak kan tum hlawm mipuiin an hriat a ngai a. Mipui kan dil chhut a, kawngpui tha tiamtute chu eng anga hma lak nge an tum kan zawh chian ngam a ngai a ni,” a ti bawk.
