Kawngsialna Leivung paihna a hranpaa ruat a ni lo

Aizawl Sept. 8 : Eight Mizoram Legislative Assembly thutkhawm vawi 10-na vawiina neih chhunzawmnaah Chief Minister Zoramthanga chuan, “Mizoram chhunga kawngpui sial hnathawh, Mizoram PWD-in a kalpui mekah leivung paihna tur hmun ruat bik a nilova, Contractor leh ram neitu te inbiak remna atangin leivung paihna tur ruahmanna siam thin a ni,” a ti.
Zawhna leh chhanna hunah Public Works Department changtu Chief Minister Zoramthanga chuan Aizawl West -III bialtu MLA VL Zaithanzama zawhna chhangin Mizoram chhunga kawngpui sial hnathawh, Mizoram PWD-in a kalpui mekah leivung paihna tur hmun ruat bik a nilova, Contractor leh ram neitu te inbiak remna atangin leivung paihna tur ruahmanna siam thin a ni a ti a, leivung paih avanga boruak leh luidung tichhe zawnga awmte chungah a hranpain hremna lekkawh anih loh thu leh kawng siam hnathawktu, NHIDCL te erawh fimkhur tura an hriattir thin thu House a hrilh.
Palak bialtu MLA KT Rokhaw zawhbelhna chhangin Zoramthanga chuan Kawlchaw leh Siakhaw inkar kawng siam mekah pavement siam that anih tur thu a sawi a, Lunglei North Bialtu MLA Dr.Vanlaltanpuia zawhbelhna chhangin Aizawl leh Lunglei inkar kawng chhia chu a foundation atanga enfiah a ngaih thu a sawi.
Thutkhawm zawhna leh chhanna hunah Aizawl South I Bialtu MLA C. Lalsawivunga zawhna chhangin Higher & Technical Education Department changtu Minister Dr. R. Lalthangliana chuan Zirna sang zawk zir duh tan awlsam zawkin student loan lak siam anih loh thu a sawi a. Socio – Economic Development Policy (SEDP) hnuaiah College lecturer chhawr anni lo a ti bawk.
Hei bakah hian Higher & Technical Education Department changtu Minister Dr. R. Lalthangliana chuan Mizoram University Southern Campus dinna tur ram tihfel ani tawh a ti a, Land Lease Certificate pawh MZU kutah hlan a ni tawh tiin, a hmunhma buatsaih chhungin a bul tan nan, Mizoram Engineering College building Pukpui Lunglei a mi chu hman lailawk tura ruahman a nih thu House a hrilh a ni.
Aizawl South II Bialtu MLA C Lalchhuanthanga zawhbelhna chhangin, Higher & Technical Education Department changtu Minister Dr. R. Lalthangliana chuan Mizorama College hrang hranga Library tihchangtlunna turin sum ruahman a ni rih lo a ti a, ngaihtuahna sen chhoh zel a ni a ti bawk.
Aizawl North I bialtu MLA Vanlalhlana zawhbelhna chhangin Dr. R. Lalthangliana chuan Pukpui Engineering College chu luah turin engkim peih fel ani tawh a ti a, hetihlai hian thawktu tur lam pek annih loh avangin a takin class ala tan theihloh tih a sawi.
Vawiin Session-ah hian MLA Lawmawma Tochhawng chuan Sixth Report on Action Taken by the Government on the recommendations contained in the fifth report of committee, on papers laid on the table relating to Finance Department, Home Department, Health & Family Welfare department and Animal Husbandry & Veterinary Department chu House ah a pharh a. Minister Lalruatkima’n The Mizoram (Land Revenue) (Amendment) Bill, chu House-ah a pharh bawk.