Kawnpui Field No 2 tihzauh leh Phullem phah hna tanna tur lungphum phum

Kawnpui a Awithangpa Hall-ah Kawnpui Field No 2 tihzauh leh Phullem phah hna tanna tur lungphum chu Sports Minister Robert Romawia Royte-in a phum a, Tuirial Bialtu MLA K. Laldawngliana, TC Pachhunga, SEDP(Tourism and Sports) Board Vice Chairman leh mi pawimawh dangte Sports Minister hi an tawiawm.
Sports Minister Robert Romawia Royte chuan Tuirial bial MLA Bye Election Campaign lai Nov 2, 2021 zingkara Kawnpui Field No 2 hmun ngeia Astroturf Football Ground kan phah ang tia kan lo intiamna chu Chief Minister zahawm tak Pu Zoramthanga zarah tihhlawhtlin a ni dawn chu lawmawm a tih thu a sawiin Kawnpui leh a chhehvel khaw hrang hrang thalai te pawh an lawm in lawm a ni tih ka hria, a ti a. Chief Minister Pu Zoramthanga kaihhruai Sawrkarah Zoram hmun hrang hrangah hmasawnna tam tak a awm mek thusawiin SEDP Phase I hmangin chhungkua singruk chuangin hmasawnna rahbi thar an tuk chho tan dawn a, tuna Phase I bakah hian SEDP Phase II pawh la sem chunzawm leh a ni ang a, SEDP dawngtu zawng zawng te dinchhuah nana hman tum turin ka fuih cheu ni, a ti.
Sports Minister chuan National Integration Policy 2020 angin zirna leh Sports kalkawppui thiam a pawimawh thu a sawi langin Kawnpui Phullem phah zawh hunah pawh Zirna in hrang hrang ten tangkai taka an hman phalsak anih tur thu a sawi a. Minister chuan Kawnpuia Hockey Academy chu Khelo India Scheme atangin Hockey Centre Of Excellence atan thlang fel tawh tiin, tihphuisui chhoh zel tum anih thu a sawi bawk.
Tuirial bialtu MLA K. Laldawngliana pawhin thusawiin MLA Bye Election Campaign laia a lo tiam tawh ang ngeia Sports Minister Pu Robert Romawia Royte leh Chief Minister zahawm takin Kawnpui Field No. 2 Phullem phahna an lo nawrchhuak chu a ropui a tih thu a sawiin Kawnpui leh a chheh vel te aiawhin lawmthu ka sawi a ni. a ti a. A satu tur Contractor leh Department official te pawhin tha taka an sak zawh a beisei tih a sawi bawk.
He Lungphum Function hi Dr. Lalrozama, IAS SYS Secretary-in kaihruaiin UN Millenium Development Goals meuh pawhin hmasawn zel nan Sport a dah pawimawh tih a sawi a. Kawnpuiin Astroturf tha tak an nei tur chu a lawmpui tak zet tih a sawi.
He Field siam that dan tur leh sak dan tur chungchangah hian Pu John Tanpuia MCS Secretary Mizoram State Sports Council-in report a pe a. A sakna tur sum Cheng nuai za ruk chu Finance Ministry hnuaia Central Assistance to State For Capital Expenditure atangin February 2022-ah Sanction dawn a nih thu sawiin Field tihzau te, Retaining wall siam te, Gallery, Pavillion, Security Fencing leh Phullem phah te thawh tur a ni anga, hna hi tan thuai tum a ni ang a ti.