Inrinni chawhma lam khan Kawnpui leh Bualpui mipui ei lai, Tuitun lui-ah Vawk thi ruang chhar a ni a; Tui pump lai pawh tihtawp nghal niin, Kawnpui VC III leh Zanlawn VC ten Kawnpui Police Station-ah FIR an thehlut bawk.
Vawk thi ruang hi mi thenkhat ten thla an la a, Kawnpui VC te hriattir a nih veleh PHED thawktute chuan enfiah nghalin, Vawk thi hi alo awm ngei a; Tuitun Lei (Bridge) hnuai chiahah hmuh anih avangin Lirthei atanga an paih ni ngeia rin a ni.
PHE Dept., Kawnpui Police leh AH & Vety Dept. te bakah khawtlang hruaituten Vawk thi hi an enfiah hnuah an seng hawi a, Tui Pump lai pawh tih tawp nghal a. Kawnpui VC III leh Zanlawn VC te chuan he thil titu te hi chhui chhuak a, man tur leh hremna pe ngei turin Inrinni khan Kawnpui PS-ah FIR an thehlut nghal a ni. Vawk thi hi Tui atanga lachhuakin an phum nghal a ni. Vawk thi hi Zirtawpni zan vela paih ni ngei a an rin thu a hmuna enfiahtu te chuan an sawi.
Kawnpui Police te chuan New Khamrang thleng-in Vawk thi paih tu hi an zawng nghal a, rinhlelh awm an hmuh loh bakah Tuitun lui leh a fintu lui te chu humhalh ani tih Kawnpui leh a chhehvel khua ten an hriat vek avangin hetiang thil hi an tih duh an ringlo tih an sawi a ni.
Save Tuitun Committee chuan tlawmngaia Vawk thi senghawi tute hnenah lawmman a pe a, Tuitun lui bakah kawng kama Bawlhhlawh paih thin te chu Aizawl lam mi an nih thin avangin a thinrim thlak hle tih an sawi.
Kar kalta Zirtawpni pawh khan Aizawl atanga Bawlhhlawh an rawn phurh tir, hnamdang motor pakhat chuan Tuitun lui-ah hian a bawlhhlawh phurh a paih lai man alo ni tawh a; Vawk hri PRRS-in Mizoram a chiah lai khan Aizawl atanga Vawk thi an rawn paih ni ngeia hriat chu Lungdai leh Serkhan ram chhungah pawh hmuh alo ni tawh.
Tuitun lui-a Vawk thi paih a nih avang hian Pu Lallawmpuia, SDO, PHED Kawnpui chuan Inrinni zan atanga nimin zing thlenga Tui pump khawl sa te chu paih vek a ngai dawn tih sawiin; hemi avang hian Tuisem pawh a khaihlak rih dawn a ni a ti.
SDO chuan Kawnpui leh Bualpui tlan laia paih anih avang hian he Vawk thi hian eng natna pawh lo kai se, tui tlantu ran te tan a pawi vek thei dawn nia hriat a nih thu sawiin; nizan leh nimin chawhma lama Tui pump khawl sa, Main Reserviour Tanky ami leh Tuitun Pump House-a awm zawng zawng te chu paih vek a ngai dawn a ti a; hei hian ni engzat nge a awh dawn tih hriat theih a nih loh avangin tunkar chhunga tui sem chu ni engemaw zat chhung a kaihlak rih dawn a ni tiin, mipui te hriatthiamna a ngen nghal.
PHED thawktute hnen atanga thudawn dan chuan Chhawllen tlang-a Main Reserviour Tanky-ah hian tui litre 13,60,000 vel dah a ni thin a; a tam tham em avang hian paih ruak tur hian chhiatna dang a thlen loh nan tum khatah paih teuh ngam a nilo a; paih ruak tur hian eng chen a rei nge a duh ang tih a hriat theih loh a ni a ti.
You sent
