Vawiin June ni 22, 2024 (Inrinni) hian Lalrintluanga Sailo MLA, MNF National Core Committee Member (NCC) chuan Bangladesh leh Mizoram insumdawn tawnna tur border trade ‘Kawrpuichhuah’ a tlawh a. Tlabung MNF Block East & West hotute nen inkawmhona hun tha tak an nei nghal.
Border Trade a tlawhnaah hian Lalrintluanga Sailo MLA chuan, “Helai hmun hi MNF leh India inremna angin, Bangladesh leh Mizoram insumdawn tawnna tura border trade kawng pawimawh tak, MNF-in kan laihchhuah leh zawnchhuah a ni. A hmingah ‘Kawrpuichhuah’ kan vuah a. Kum 2003 daih tawh khan, a hun laia Rural Development (RD) Minister Pu Aichhinga (L), Chief Minister Pu Zoramthanga leh Minister Dr.R.Lalthanglianate khan bul ṭan tura min tih angin, keimah ngeiin rawn zawng chhuakin bul ka tan ta a ni. Pawisa pawh cheng nuai 30 vel chauh hmangin a panna kawng hi bul kan tan ta a. MNF sorkar kal ta khan a panna kawng pawh double lane-in a lai chhuak hman vek a ni. Tunah a hlawhtlinna hmel kan hmu tan ta hi lawmawm ka ti hle a. Helai vela chengte leh chhim lam mipui mai bakah Mizoram tan a pawimawh em avangin, hmalakna kal mek hi sorkar thar hian chak taka bawhzui zel turin ka ngen takzet a ni,” a ti a, he lai boder trade tihhlawhtlin thuai a pawimawhzia thu a sawi bawk.
Hemi hnu hian Lalrintluanga Sailo MLA hian Tlabung MNF office-ah MNF East & West hotute nen inkawmhona neiin, West Tuipui constituency chu MLA-ah MNF an chakna leh MP (LS)-ah an chakna bial a nih avangin lawmthu a sawi.
“Mizoram a awm chhung hian kristiante tiduhdahtu BJP hian Mizoramah MLA 10 aia tam an nei ngai lo ang. Congress hi an sual hauh lo, an thutiam NLUP pawh mipuiah an sem mai a, an ti tha hle. Mahse, an kalphungah hian Mizoramah chuan an ding chhuak ngai tawh lo ang. Keni MNF pawhin SEDP kan tiam a, budget-ah kan dah nghal a, covid vang khan kan kalpui hlei thei ta lo a ni. ZPM lah political party ni lovin, movement a ni a, pawl hrang hrang kalkhawm an ni a. ‘Min enchhin rawh u,’ an ti a. Thla 6 kan enchhin chhung chauh pawhin mipuiin an hne hle tawh a ni. Kal ngaihna hre lo, policy mumal nei lo an ni a, an tla thuai ang. Covid vang khan Mizoramin cheng vbc 90 kan hmu a, ZPM ho hian kha tih lai khan min dem luih luih a, covid vanga cheng vbc 2600 kan hmuh loh thu hrechiang hletu an ni leh daih si a ni,” a ti.
Dampa bialtu MLA chuan ZPM hovin ‘hand holding policy’ an tih hi awmze nei lo a ni, mi pangngai bana inkaih thu a awm ngai lo.Tunah pawh ration card vara laten tunah kg khat cheng 15 a lak anih mek laiin, kg khat cheng 37-a la tura an beih mekte hi mipui tawrhna nasa tak tur a ni a, lo ennawn leh se ka duh hle a ni, a ti bawk.
