Aizawl, the 26thMarch 2022 : March ni 23 khan Labour, Employment, Skill Development & Entrepreneurship (LESDE) changtu Minister Pu Lalchhandama Ralte chuan LESDE Department buatsaih ni hnih awh ‘KAWTCHHUAH – 2022 kharna chu Govt. ITI Campus-ah a hmanpui a, he programme hi Govt ITI atanga zirchhuak te tana an mahnia eizawnna kawng an dapchhuah theih nana ‘start-up fair’ a ni.
Kharna programme ah thusawiin LESDE Department changtu Minister Pu Lalchhandama Ralte chuan, he programme hmanga awmze nei taka mithiamte hrualna hnuaia I.T.I zir chhuakte eizawnna tur atan Sawrkarin LESDE Department kaltlanga bultanna tur a buatsaih chu lawmawm a tih thu a sawi a. KAWTCHHUAH hmanga bul tan turte, eizawnna ngelnghet neihna atan chi pek in ni a, he chi hi in eizawnna tur zawn theuhah in tuh tiah a, thenawm khawvengte leh Zoram tan rah duhawm tak chhuah theuh turin intihsiakna a telte a fuih a ni.
Kharna inkhawmah hian Pu Lalramsanga Sailo, Secretary, LESDE chuan kalkhawmte lawmna thuchah sawiin, ITI pass chhuakte eizawnna leh an hmasawnna tura LESDE Department hmalakna a hmawr an bawk thei ta chu lawmawm a tih thu sawiin, Skill khawvel tilian a, tichangtlung zel tura theih tawp chhuah turin kalkhawmte a chah bawk a ni. Pu K.Lalhmingliana, Director, LESDE chuan kalkhawmte leh he hun a rawn telte chungah lawmthu sawiin kharna hun a hmang a ni.
KAWTCHHUAH-2022 ah hian mi ti tha 21 thlan chhuah niin, heng thlanchhuahte hi tangka fai Rs. 50,000/- theuh an eizawnna bul tan nan hlan an ni a. Computer Operator & Programming Assistant (COPA), Wireman, Electronic Mechanic, Plumber, Baker & Confectioner, Cutting & Sewing, Welder leh Carpenter trade atang tein lawmman hi an dawng a. Heng thlanchhuahte hmalak chhunzawmnaah LESDE Department chuan uluk takin endikna a kalpui zui dawn a ni.
He programme-ah hian intihsiakna a mithiam rawihte (Expert Panel) ten intihsiakna a telte ‘Mentoring Session’ an neihpui bawk a, Pu James LT Thanga, Associate Professor, Dept. Of Economics, Mizoram University, Pu Mark Lalduhsaka, CEO, Angel Business Promoters of Mizoram leh Pu David R. Lalsawmtluanga, Proprietor, Liando Auto Works ten he hun hi an hmanpui a ni.
