Biate, 29/6/2022: Vawiin hian kum 2022 MZP Headquarters Biate Zirlai ti tha chawimawina programme hman a ni a, khuallian atana an sawm Zodintluanga Ralte, MLA, Treasurer MPCC chuan thu sawiin, “Khawtlang inrelbawlna fel tak avangin khaw zahawm tak siam a ni thin a, chutianga inrelbawlna fel tak nei chu Biate khua hi a ni,” a ti.
MZP Hqrs. Biate ten Zirlai ti tha chawimawina programme Chairman Lallungmuana, President MZP Hqrs Biate chuan, “MZP chu political party kan ni lo a, vawiina Pu Zodintluanga MLA kan sawm chhan hi Biate tui lak Biate Water Supply Scheme min tihsaktu leh khaw fai kan nih avanga cheng nuai 50 laia khaw chhung min cheimawi saktu a nih vang a ni,” a ti.
Khuallian Pu Zodintluanga chuan, “Biate hi citizenship min petu in ni a, ka mikhual lo hle a ni. Vawiina zirlai ti tha chawimawi nachang hria kan awm hi lawmawm ka ti takzet a ni,” a ti.
“Biate khua hian library in neih that vang nge ka hre lo a, in inkaihhruaina hi a tha em em mai a ni. Khawtlang hruaitutena khua in hruai dan leh inrelbawl danah entawntlak in ni ka ti a. Khawtlang in inrelbawl dan a fel a, khaw fai ber in ni reng ringawt pawh hi in fakawm takzet a ni,” Pu Zodintluanga chuan a ti.
Biate khawtlang inrelbawlna a felfai avangin Mizoramah mite hriat hlawh leh entawn tlak tak tak an chherchhuah thu sawiin Pu Zodintluanga chuan, “Mite entawn tlak, mite aia chungnung tak tak hi kawng hrang hrangah in chherchhuak a, Biate atang hian mi lar tak tak an lo chhuak thin, hei hi in inkaihhruaina tha, Mizo nun ze mawi tak in intuh vang a ni,” a ti.
Vawiina zirlai ti thate chungchang sawiin Pu Zodintluanga chuan, “Biate khaw chhuak mi ropui tak takte aia tha leh ropui in la ni thei a, tun dinhmunah chuan electric eng hnuaiah tui kang nghah ngai lovin lehkha in zir thei tawh a, in hna chu taima taka lehkha zir a ni mai tawh a ni,” tiin a sawi. Zirlai ti tha chawimawinaah hian faina awareness campaign leh malaria awareness campaign neih nghal bawk a ni.
Zirlai ti tha chawimawite hi Eastern High School Biate atangin 19 an pass a, Biate Higher Secondary School atangin 35 pass bawkin, hmun dang atanga pass mi pasarih an tel bawk.
