Khawvel puma Salvation Army hotu lo kal dawn

Khawvela Salvation Army hotulu ber General Brian Peddle an nakkum January thlaah India Eastern Territory a rawn tlawh dawn tih General Visit, Communication & Documentation Sub Council Chairman Major Reuben Lalnunthara Hnamte chuan thuthar thehdartute a hrilh.
General Visit, Communication & Documentation Sub Council hruaitute hian Aizawl Press Club-ah General Brian Peddle lo kal tur chungchangah thuthar thehdarhtute hi vawiin khan an kawm a, General hi nakkum Januray ni 30 ah Mizoram lo thleng tura ruahman a nih thu an sawi a, a cham chhung hian February ni 1-5 inkar chhunga India Eastern Territory, Territorial Congress a hmanpui dawn a, Phunchawng-a Salvation Army biak in thar a hawn dawn bakah sorkar hotute a kawm dawn a ni.
General Brian Peddle hian kum 2020 khan India Eastern Territory hi tlawh a lo tum tawh tih an sawi a, Covid 19 hri leng vangin a tulh a hri a ziaawm tak avangin nakkum a rawn kal hi a tum ta a ni an ti. General lo kal tur atan hian kawng hrang hrangin inbuatsaihna pawh an kalpui thu an sawi a, sipai pawl member te pawh an phur hle tih an sawi. Tun dinhmunah India Eastern Territory huamchhungah hian member sing 6 chuang hret an awm tih an sawi a, he territory ah hian Division 7 leh District Hqrs. 1 a awm thu an sawi.
General hi Canada lam chhuak niin General 21 ni turin kum 2018 May ni 24 khan International High Council-in a thlang a, India Eastern Territory a rawn tlawh hunah hian a nupui Commr. Rosalie Peddle in a rawn tawiawm tura beisei a nih thu an sawi bawk.