October 28, 2023 (Inrinni) chawhnu khan Karnataka Sorkar a Cabinet Minister of Energy, Pu K.J George chuan Pu Lal Thanhawla, India rama Congress Party rorelna sang CWC member chu a chenna inah tlawhin an inkawm.
Pu K.J George chuan, India ramah Kristian te nekchepin kan awm nasa hle a. Hei hi Pathianin a ram zauh tura min nawrna leh nasa zawka tan la tura min kohna a ni, a ti a. Mizoram hi India rama Kristian State awmchhun a ni a. Hei hi BJP hian thiah vek tumin tan an la mek a, hei hi Manipur-a kan unau Kristian te chunga tawrhna hian a ti chiang a ni, a ti.
Mizoram hi ka Kristian puite a hlawma an awm na a ni a, ka lo kal fo ang. Mizoram hian India rama kan Kristian sakhaw dinhmun tur ngaihtuah thleng phak Politics kan ngaihven a tul. Kan sakhua a him loh chuan kan hnam a him lova, kan ram a him ngai lovang. Congress Sorkarna hmunah Kristian-te tunah Zalen takin chanchintha an hril thei a. India ramah Pathianin a chanchin tha hril turin hna min thawh sak a. Karnataka State-ah hneh takin Congress min sorkar tir a. Karnataka State-ah Congress a sorkar hlimah Anti-Conversation Law kan thiat a. Tunah phei chuan Kristian Development Corporation din turin ruahmanna kan siam a, hemi atan hian cheng vaibelchhe 100 kan dah hrang tawh. Hei hian Congress Party hi sakhaw zalenna kengtu a ni tih a nemnghet chiang a ni, a ti.
Pu Lal Thanhawla pawhin Mizoramah Congress a sorkar ngei a ngai. Sorkar turin hruaitu leh MLA Candidate tha ber ber Pathianin min pe. Kan Chief Ministerial Candidate phei chu Mizoram mipuiin an rin rawn a ni, a ti a. India ramah Kristian-te dinhmun him lohzia sawiin, Mizoram chu Pathianin a Kohhran ho hmangin kal kawng min kawh hmuh a. Kuminah pawh Sunday School zirlaiah kan ram tana pawimawh em em ”Kristiante rinna Vawn him” tih hmangin zirtirna min pe a. Hei hi kum thum kal tawha buatsaih a ni a. Kohhran kal tlanga Pathianin kan ram hun tawn min hrilhlawk sakna baka hrilhlawkna dik hi a awm chuang lo a ni, a ti bawk.
Pu K.J George leh Pu Lal Thanhawla hi thian tha tak niin kum 1984 a Pu Lal Thanhawla Mizoram Chief Minister a nih lai khan Pu K.J George hi AICC General Secretary niin AICC atanga Mizoram changtu (incharge) a lo ni tawh thin a ni.
