‘National Seminar on the Kaladan Multi-modal Transit Transport Project (KMMTTP) : Prospects and Problems’ chu vawiin khan Seminar Hall, School of Social Science Mizoram University ah neih a ni a; Commerce and Industry Minister Dr R. Lalthangliana chuan khuallian niin a hmanpui.
Khuallian Dr R. Lalthangliana chuan KMMTTP chu India hmar chhak State te tana hmasawnna Project pawimawh tak a ni a, a bik takin Mizoram chu a hlawkna tel tur ber State a ni a ti. KMMTTP chu zawh thuai a beisei thu sawiin mipuite inbuatsaih a ngai hle a, State dang atanga lo kal bungrua, ei leh bara innghat mai lovin a thawn chhuaktu kan nih a hun tawh hle a, chutiang tur chuan kan rilru leh ngaihtuahna kan siam fel a ngai a ni a ti. Minister chuan KMMTTP chu ram intodelhna kawnga nasa taka puitu tur a nih avangin sawrkar pawhin theihtawp a chhuah mek zel a, kum 2008 khan Mizoram leh Central sawrkarin inremna thuthlung an lo ziak tawh a ni a ti.
Dr. R. Lalthangliana chuan KMMTTP mai bakah Bangladesh nena insumdawn tawnna pawh hmalak mek zel a ni a, Border Haat-te pawh siam mek zel a ni a ti. Mizoramin kan thil thar leh siamchhuahte kan thawn chhuah zung zung theihna turin KMMTTP-a Contractor te chu chak zawka an hna kalpui tur leh theihtawp chhuahpui turin a chah nghal bawk a ni.
National Seminar hi Department of Political Science, Mizoram University buatsaih niin Prof. Lalneihzovi, Dean School of Social Science chuan a kaihruai a ni.
