Kolasib-ah thisen 85,096 endikah 1690 HIV+

Vawiin khan ‘Putting Ourselves to the test, achieving equity to end HIV’ tih thupui hmangin School of Nursing, Thingdawl, Kolasibah ‘World Aids Day 2022’ pual a hun hman a ni a. John LT Sanga, Deputy Commissioner chu khuallian niin Dr. Lalawmpuia Chhangte, Chief Medical Officer chuan hun a kaihruai a ni.
Deputy Commissioner John LT Sanga chuan WHO pawh ina a ngaih pawimawh avanga a hranpa a ‘World Aids Day’ hmanna chuan he natna khirh tak lak a kan inven thiam nan leh kan fihlim theih nan uar zawk a inzirtirna kalpui a tul thu a sawi a. AIDS chu natna khirh tak ni siin a inkaichhawn dan tam zawk erawh nun ulukna leh insumtheihna hmang a hneh theih a nih thu a sawi.
John LT Sanga chuan, Kolasib district chhungah hmasawnna hrang hrang hmachhawp a awm thu sawiin chung hmasawnna a tak a hmang tangkai tur chuan a chhunga cheng mipuite an hrisel a tul thu a sawi a. Natna enkawl hautak tak, nun uluk loh avanga inkai darh awl tak si chu ram leh hnam hmelma, hmasawnna tithuanawp thei a nih avangin kan do hneh theih nan tun atanga nun kawng uluk tak a zawh a pawimawh thu a sawi.
AIDS darh zel tur dona chu Department bil anga do hneh chi a nih loh thu te, mimal tin mawhphurhna a nih thu leh thawhhona leh tanrualna hmang a hmalakna kalpui a pawimawh thu John LT Sanga chuan a sawi bawk.
Hun kaihruaitu Dr. Lalawmpuia Chhawngte chuan AIDS lak a fihlim tur a hmalakna kalpui a pawimawh rualin AIDS veite chu chhungkua, khawtlang leh kan nitin hun hmanna ah en hranna awm lova, a tul ang zel a tuam hlawm leh dawm kan a tul thu a sawi.
Dr.RK Lalthlamuana, DACO chuan HIV hrik inkaichhawn dan te, inven dan leh enkawlna kalpui dan tarlanna hun a hmang a. Kolasib district dinhmun tlangpui tarlangin January 2002 atanga October 2022 thleng a thisen 85,096 endik tawh ah 1690 chu HIV hrik pai an ni tih hmuhchhuah a ni a. October 2022 chhunga thisen 580 endik atangin HIV+ 7 hmuh a ni.
Lalbiakzuala, DPM chuan ‘World Aids Day 2022’ pual a thupui hrang hrang hmang a Middle, High School leh Higher Secondary School atanga zirlai 65 an tel thu a sawi a. Middle School level ah K.Lalmuansangi, Brighter Faith Academy, High School level ah Mary C.Lalnghahmawii, Govt. Diakkawn High School leh Higher Secondary School level ah K.Lalhmingfaka, Govt. CZ Higher Secondary school ten lawmman pakhatna an la a ni.