Mizorama pawl pali Mizoram Transformation Movement (MTM), Centre For Environment And Social Justice (CESJ), Mizoram First (MF) leh Citizen Alliance For Truth And Justice (CATAJ) te chuan Mizoram kawngpui pawimawh Kolasib atanga Sairang inkar chu Mizoram mipuite tana pawimawh anih avangin sawrkarin rang taka hma a la lo anih chuan mipuite hnatlanga an chhuah mai a ngaih tur thu an sawi.
Vawiin khan Aizawl Press Club ah chanchinthar lakhawmtute kawmin, Kolasib atanga Sairang inkar kawng chu zawh hlehtheihloh khawpa chhia anih avang leh motor tlu leh tang an awm thin thu sawiin chak lakna kawngpui pawimawh tak anih avangin sawrkar chu a rang lama hma la turin an phut tih an sawi a ni.
Mizoram Transformation Movement President Dr Lalbiakmawia Ngente chuan, National Highway 06 package 8 Kawnpui atanga Khamrang inkar kawng chu vawiin thleng enkawl ala nih loh thu a sawi a, kumin June ni 30-a PWD Minister Pu Vanlalhlana’n helai kawng enkawl hna chu Mizoram PWD mawphurhna a ni lo anga a sawi chu thudik lo a ni tih sawiin, mipuite rilru hruai kawi nan a he thu hi sawi ah pawl pali te chuan an ngaih thu leh helai hmun hi Mizoram PWD enkawl lai ngei a nih thu an sawi bawk.
