Kuhva chungchanga harsatna thleng cingfel turin MNF sawrkar kan phut : MPCC

Congress Party chuan thuchhuah siamin, “Mizoram khaw thlang lama Kuhva chingtuten Kuhva tawlhruk a tam avang ni a ngaih theih a an Kuhva thar an hralh thei lo leh, chumi avanga harsatna hrang hrang a thleng chho ta te, Mizo leh Mizo inkara inepna hial a thleng ta hi Congress Party chuan pawi a ti takzet a. Heng zawng zawng hi Mizoram sorkar chak loh vangte, ram hruaitu lu thenkhatte leh Kuhva tawlhrukna a inhnamhnawih, Assam sorkar wanted-te nen meuh pawha inzawmna tha tak an neihin a hrinchhuah a ni tih Mizoram mipuite hian kan hriat a ngai a ni.
“Ram pawn atanga Kuhva rah lakluh leh phurh kual hi dan anga kalpui theih reng a ni a. Dan hnuai kalpui a nih theih nan sorkarin a duh chuan hma pawh a la thei reng a ni. Amaherawhchu, hetiang lama hmalakna awm chuang si lo, harsatna thleng pawh chinfel tuma hmalakna awm chuang si lo hi Congress Party chuan a hrethiam thei lo a. MNF sorkarin awmze neia hma a lak theih loh avangin Assam lamin an state chinah harsatna an siam chho ta a, Mizoram tharchhuah ngei ngei Kuhva te pawh tawlhruk thila ngaiin an kaltlang tir phal ta lo a ni. Hei vang hian Mizoram chhung ngeia Kuhva chingtuten harsatna an tawk ta a, an thlai thar Kuhva chu an hralh thei ta lo a. Kuhva phurtu motor neitute nen an inkarah inepna hial a thleng ta a ni.
“He thil hian MNF hi rorel zel tlak an ni lo a ni tih leh, dan leh thupek kenkawhna kawnga an hlawhchham a ni tih a tichiang hle a. Loneitute tawrhna pawhin a koh eih zawh loh sorkar kan nei hi a vanduaithlak takzet a ni. Sorkar tha chuan a mipuite harsatna a chinfel sak tur a nih laia mipuiin an harsatna chingfel tura hma an lak a ngai ta hi a vanduaithlak kan ti takzet a ni.
“Kuhva chungchanga Mizoram harsatna tawhte a rang thei ang bera chingfel turin Mizoram sorkar kan phut a. Assam sorkar pawh Mizoram tualchhunga tharchhuah Kuhva phurhna kawngah harsatna siam tawh lo turin kan phut bawk a ni,” tiin an tarlang.