ZPM Thalai chuan, “Kuhva tawlhruk tihtawp a nih theihna tur chhuanlama Pu C.Lalrosanga, Lok Sabha M.P-in Union Home Secretary Pu Ajay Kumar Bhalla a hmu leh Rajya Sabha-a Pu K.Vanlalvena, Rajya Sabha M.P-te an au chhuah hial a ngai hi Mizoram sawrkâr tan a mualphothlâk hlein kan hria a; MNF member Mizoram M.P pahnihte hian dan leh thupek kenkawh kawnga MNF sawrkâr hlawhchham zia Delhi tlângah an au chhuahpui a ni ber,” an ti.
Vawiina thuchhuah an siamah ZPM Thalai chuan, “Lok Sabha M.P Pu C. Lalrosanga’n kuhva tawlhruk chungchânga Union Home Secretary a hmuh hian, dan lova kuhva lakluh anih dan te, MNF ministry ngeiin GST lem hmanga dan lova kuhva phurh luh a phal sak dan te, chumi avanga Mizorama kuhva tharchhuaktute’n an kuhva hralhnaa buaina tawk an nih dan te sawi lang ngam lovin, a him chinah Union Home Secretary hi a kawm em ni?tih hi kan zawhna a ni.
“Kum 2022 chhungin Mizoram District hrang hrangah kuhva ro thahnem tak Rs. 4,92,79,657 man hu man a ni tawh chung pawha, Kolasib District-ah chauh case mi 5 chungah siamsak a ni hian mipui ngaih a tiṭha lo a. Kuhva ro dan lova tawlh ruk chungchangah mipuiin MNF Ministry rinhlelhna nasa tak an nei a ni.
“MNF M.P pahnihte hian kuhva ro tawlh ruk hi tihtawp an duh takzet a nih chuan, Mizoram lama an party hruaitute hnena thlen zawk turin thurawn kan pe a ni,” an ti bawk.
