A hnuaia tarlan ang hian Kuhva man tawh sa tihral chungchangah vawiin tlai khan Kolasib District Magistrate Pu Robert C Lalhmangaiha chuan thuchhuah a siam:
Tunhnaiah Polytechnic Building, Thingdawl-a Burma kuhva kum 2022 chho vel atanga man tawh dahkhawm tihral tumna chungchangah Kolasib khawpui atangin thuthang belhchian dawl lo lengvak a awm tih hriat a ni a. Thu ziktluak hre chiang lova social media i.e. whatsapp leh youtube etc., vela thu thehdarh a awm hi a pawi hle a. Kan mipuiten thuchiang an hriat theihna tura he thuchhuah hi siam a ni.
Kolasib District chhungah leh Kolasib khawpui chhung hmun engemawzatah Burma kuhva (dry Myanmarese Arecanut) man sa, Kolasib District Court-in a chungthu a rel tawh hi dah an ni a. A tam ber chu Polytechnic Building, Thingdawl-ah dah anni. He Polytechnic Building hi Higher & Technical Education Department hnuaia awm niin, tun hunah hian sak that leh thawm that (repair & renovation)kalpui tura ruahman a ni a. A khawihtu tur contractor pawh ruat fel tawh niin kan hria. He polytechnic building chung hi a pawp nasa hle a, hei avang hian a chhunga kuhva dah hi a chhe nasa tawhin, a mawih nasa hle tawh bawk. Kuhva rihna (weight) hian building himna hi a ti derthawng hle bawk a ni.
Heng kuhva man sa leh an chungchang rel fel tawh, District Court-in District Magistrate kuta tihral tura a dah fel tawhte hi engtianga tihral tur nge ni ang tiin District Administration leh Police lam chuan ngun takin kan ngaihtuah a. Phum bo emaw, hal ral emaw, paih emaw, CrPC leh kan dan thar BNSS-a (relevant section of CrPC/BNSS) District Magistrate thuneihna angin hralh emaw ngaihtuahin, a tha ber tur kan zawng a. Phum bo turin mimal/Govt. Department hmunhma remchang a awmlo va, tin, hal ral a nih chuan sum tam tak sen a ngaih dawn bakah environmental issue nasa tak a awm thei dawn a. Tin, thehthanga, paihdarh hian mi thenkhat lo chhar khawma sumdawnna atana hman tum an awm leh thei bawk a. Heng zawng zawng ngaihtuah hian kuhva chhia leh hlui, a dahna hmun tihruah ngai bawk si hi – a chunga dan tarlan tlawhchhana, a lei thei tur hnena tihral mai hi District Magistrate chuan a thuneihna angin tha a ti a. Tunhnaiah All NGO Co-ordination Committee, Kolasib leh chanchinbumite nen pawh thu hrang hrang ngaihtuaha inkawmhona neih a ni a, he hunah hian District Magistrate hmalakna hi a thuphunga tarlan a ni a. District Magistrate thuneihna angin auction (lilam) hmanga tihral a ni ta a ni. A leitu hian Polytechnic Building-a kuhva dah mek hi phur chhuaka, a building a tihruah bakah, thenfai ngai thian faiin, felfai takin a hna a kalpui dawn a ni.
Kolasib District Magistrate hmalaknaah hian thu ziktluak hrechiang hmasa lova, ngaihdan lo siam mi engemawzat an awm niin a lang a. Hengte hian hriatchian duh an neih chuan District Magistrate, Kolasib District hnenah emaw Bawrhsap Pisapui, Kolasib-ah emaw, Office hun chhunga rawn kal a, thu chiang rawn zawt hmasa turin kan inngen a, kan inhriattir a ni e.
