Kuhva tawlh chungchanga sorkar hmalakna tur sawipui

Aizawl May 18,: Central YMA hruaitute chuan dan lova Mizoram chhunga kuhva tawlhluh an zirchianna atanga sawrkar hmalakna tur point 4 chu Chief Minister Zoramthanga hnenah an thehlut.
Vawiin khan Central YMA hruaituten chuan Mizorama dan lova Kuhva tawlh leh ruihhlo do chungchangah Chief Minister hmu in hmalak dan turah rawtna an thlen. Central YMA President R Lalngheta hova Chief Minister an hmuhna ah hian Mizorama dan lova Kuhva tawlh chungchangah Central YMA hnuaia zirchiangtu Study Team in Report an siam atanga hmalak dan tur rawtna Point 12 zinga Sawrkar hmalakna tur Point 4 – Dan anga sumdawnna a kal theih nan Kuhva a chhiah lak (Tariff Rate) Basic Custom Duty 40% chu 20% a tihniam tura hmalak te, kuhva rawn luhna District hi ramri leh hmun pawimawh a nih avangin hemi huamchhunga Sawrkar lam thawktu ruat chungchangah mi bik leh rintlak ruat nise, Kuhva luhna ber Champhai District ah dan lova sumdawnna khuahkhirh a nih theihnan DC, SP, NGO aiawh te telna District Level Coordination Committee din nise, tih leh Police, Custom leh Assam Rifles te rualkhai taka an thawhho theihnan hmalak nise, tih te Chief Minister hnenah hian thlen a ni a. CM chuan lo en zui a, theihtawpa hma lak nghal a tum thu a sawi.
CYMA hruaitute chuan tunhnaia Mizorama Ruihhlo hluar lutuk chungchanga hmalak dan tur leh kum 2018 a Chief Minister kaihhruaina hnuaia din ‘State Level Core Committee on Ruihhlo Do ‘ chu tuai thar leh an duhthu an sawi a. CM chuan he Committee hi tuai thar a, May 27,2022 a Meeting koh nghal turin ruahmanna a siam nghal bawk.