Mizoram chhunga Kuhva tawlhruk chungchanga PIL ah Gauhati High Court chuan Mizoram Chief Secretary insawifiah turin a ti.
Ni 17.5.2024 khan Pi Vanramchhuangi’n kuhva ro tawlhruk chungchanga Public Interest Litigation(PIL) a thehluh chu Gauhati High Court, Division Bench, Chief Justice Vijay Bishnoi leh Justice Michael Zothankhuma thutna chuan a ngaihtuah a. Court chuan an Order dt.22.1.2024 ah kuhva ro tawlhruk chungchangah, petitioner leh respondent te thu thelhluh (affidavit) atangin an hmuhdan chiang taka an tarlan tawh hnuah leh state sawrkar chu petitioner FIR thehluh chungchanga investigation thar kalpui tura a tih hnu-ah leh FIR thar pawh an register theih thua thupek a pek hnuah pawh petitioner FIR chu register chhunzawm loh a la ni leh zel chu a lungawi thlak loh hle a ti a ni.
Court chuan Pi Vanramchhuangi FIR thehluh chu register lovin Investigation officer chuan a hma-in CJM, Champhai-ah application thehlutin chhui phalna a dil a, chu application chu CJM, Champhai chuan dt.7.1.2022 ah a hnawl sak a, chu mi hnuah High Court chuan 22.1.2024 ah Order a siam a, he order a siam hnuah pawh CJM, Champhai-ah tho chuan chhui phalna police lam chuan an dil leh a, hei hi High Court chuan an order dt.22.1.24 siam chu Officer in charge, Champhai chuan a zawm lo lui a tih bakah state sawrkar chuan he thil hi a ngai thutak tawk lo a ni a ti.
Chutiang anih avang chuan High Court chuan Chief Secretary chu ama mimal insawifiahna (personal affidavit) theh lut a, Court Order Dt. 22. 01.24 an zawm loh chhan sawifiah turin a ti a ni.
Ani bakah Officer-in-Charge, Champhai Police Station pawh ama mimal insawifiahna (personal affidavit) thehlut a, petitioner Pi Vanramchhuangi’n kum 2021-a FIR a thehluh chu tun thlenga register a nih loh chhan sawifiah turin a ti bawk.
He PIL No. 5/2022 hi karthum hnuah ngaihtuah leh tura tih a ni.
