Vawiin September ni 23, 2022 (Zirtawpni) hian *National Programme for Prevention and Control of Deafness (NPPCD) bultumin World Day of The Deaf, Ephatha Special School, Kulikawn West-ah hman a ni.*
Kuminah hian tum dang ang bawkin thupui neih leh a ni a, kumin thupui atan *Building Inclusive Communities for All* hman a ni. He hunah hian khuallian atan Nl.Baryl Vanneihsangi, AMC Councillor, Ward-XIX niin, Khualzahawm atan Pi Vanlaldiki Sailo, Commissioner of Person with Disabilities(PwD) a ni.
Khuallian Baryl-i chuan, “Inclusive Communities chu mi danglam bik leh vanduaina tawk te’n him ni a an inhriatna huang, zahawm ni a an inhriatna hmun, nuam ti tak leh an nihna ang anga an tel theihna, thalamuang taka an chenna hmun hi a ni a, chu an chenna environment tha siam tur chuan mipui zawng zawng team khata awmin hma kan lak a ngai a ni. He natna leh vanduaina hian tumah a thliar lova, kan chunga thleng thei reng a nih avangin enkawl leh ngaihsak kan duh ang chiahin tuna ri hriatna lama harsatna nei te chungah hian zahngaihna leh hmangaihna kan lantir tur a ni,” a ti.
AMC Ward -XIX Councillor chuan, “Lalpa vohbik te hi an nihna anga kan pawm a, an theihna te kan ngaihlut chuan anmahniah inrintawkna pein an thlen theih sâng ber thleng turin phur takin ke an pen ang a, an harsatna ang tuartute tan sulhnu entawntlak tha tak tak an hnutchhiah thei dawn a ni tiin hmangaihna leh dawhtheihna nen enkawl a, tuamhlawm zui zel turin Mizo mipuite a ngen a ni,” a ti bawk.
