Vawiin January 10, 2023 (Thawhlehni) hian kum 2023 atana Congress Bhavan hawnna leh mi thar lawmluhna hun, Golden Hall, Congress Bhavan-ah neih a ni a. Pu Zodintluanga Ralte, MLA & Treasurer, MPCC-in inkhawm a kaihruai a, Rev. PB Mankima’n Pathian thuchah a sawi bakah Pu Lalsawta, President, MPCC leh tun hnaia Congress zawm thartu mi engemawzatin thu an sawi.
He huna thu sawitu Pu Lalsawta, President, MPCC chuan, “Congress Party hi miin an hrechiang lo thin a, Central a an sorkar loh chuan Mizoramah an sorkar dawn lo an ti thin. Mahse, Central a Congress a sorkar loh avang maiin Mizoramah Congress tan a sorkar theih loh tihna a ni lo. Central lamah sorkar lo mah ila, kum 2023-ah hian Mizoramah kan sorkar dawn. Party thenkhatten an sum neih ringin inthlan an zuam a, an chak ngei pawh an inring. Keini erawh chuan II Chronicles 20:12 thu ‘…a tihngaihna reng reng kan hre bawk hek lo. I lam kan lo hawi mai zawk a ni e,’ tih angin Pathian lam kan hawi mai a ni,” a ti.
Pu Lalsawta chuan, “Kum a thar angin rilru thar, duh dan thar, nun dan thar nen bul i tan ang u. Mi tling lo leh fam kim lo tak tak kan nih kan inhria a, mahse Pathianin, ‘Tih nuam tak leh thuawih taka in awm chuan, in rama thil thate hi in ei ang’ a tih angin tih nuam tak leh thuawih takin i awm phawt mai ang u. DCC, Block, Group leh Unit-te inhuam ila, inpe ila, candidate te ti hautak lo a, an tana phur rit siam lo thei ang ber zawngin chet i tum ang u,” a ti bawk.
“Ram hmasawn nan power mamawhna a sang tial tial a, chuvangin, Congress kan sorkar a nih chuan power siamchhuah belhna hi kan ngai pawimawh dawn. Tin, ram thenawmte nen ram dan anga insumdawn tawnna mumal takin kan siam bawk ang. Tun anga smuggling bupui a insiam kher lo hian dan angin ram dangte nen a insumdawn tawn theih. CYMA leh Synod-in Corruption do an puang tawh. Mi tam ber kan telna pawlten an duh ang ngeiin Congress hian Corruption kan do dawn a ni. Congress sorkarah chuan tumah an corrupt lovang. Mizoram hi mi taima leh thawk rimte dinchhuahna leh hlawhtlinna ramah kan siam dawn,” a ti.
Pu Lalsawta chuan India ram pum leh Mizoramah Kristiante tan Congress a sorkar leh a ngai tih sawiin, “India rama sakhaw zalenna nekchepin a awm mek. Chuvangin, Mizoram Kohhrante, Kristian tha tak takte hian sakhaw zalenna a taka kalpuitu Congress party kan sorkar leh hi an nghakhlel tih i hria ang u. India ram pumah leh Mizoramah kan sorkar leh a ngai a ni,” a ti.
He hunah hian Upa Dr. RK Lallianthanga, Mizo Scientist, Chief Scientific Officer (Rtd), Science & Technology chuan Congress Party a zawm thar a, MPCC President Pu Lalsawta’n a lawmlut a ni. Congress zawm thartu Upa Dr. RK Lallianthanga chuan thu sawiin, “Mizoram hi ka vei a, a bikin Mizoram chhim lam hmasawnna hi ka vei tak zet a, chumi atana theihtawp a hna thawk ve turin Congress Party-ah ka lo lut a ni,” a ti. “Congress Party hi India ram leh Mizoram a Party tha ber a ni. Pawn lam atanga ka hmuh dan dik takah chuan Mizoramah hian Congress Party rorel laiin hmasawnna ruhrel liantham din leh ruahman a tam ber a, remna leh muanna kawngah a thawh hlawk a, mi rethei leh chan haite, hnam hnufualte a ngaihsak a, Congress hian thil theih loh mipui sawihmuh a ching lo a, sorkar hnathawk tan pawh party hrawn nuam ber a ni thin,” a ti bawk.
