Congress Thalai Hqrs. – Mizoram Pradesh Youth Congress Committee (MPYCC) President Dr. Lalmalsawma Nghaka chuan Kum 2023 Inthlanah sawrkar tha siam turin Congress party a inbuatsaih mek a, mi ram Chief Minister awt ngawih ngawiha kan awm tawh lohna turin sum enkawl thiam leh eirukna laka mi fihlim Pu Lalsawta chu Mizoram mipuiten kan Chief Minister tir ngei a ngai a ni, a ti.
He thu hi Mizoram Pradesh Congress Committee (MPCC) Campaign Committee programme anga Aizawl khawpui chhunga Congress Unit tlawhchhuah programme hman mekah nizan khan Chhinga Veng Unit pathum te a tlawhnaah Dr. Lalmalsawma chuan a sawi a, tun dinhmunah kan ramin a mamawh ber chu thusawi thiam ni lovin hnathawk thiam a ni. Enchhin ve ngai tawh lo hruaitu tha hmang hian kan ram sum dinhmun harsatna khurpui ata chhanchhuah hna hi thawh a tul tawh takzet a ni, a ti.
Manifesto chungchang sawiin, MPYCC President chuan, “Congress Party Manifesto No. 1 (Tang Puihna) hi ram siam tak tak tumna Manifesto a ni. Taimakna leh tumruhna kawng kan zawh tlan theih nan a duan a ni. Mizoram mipuite khawvel changkang zel el pha mai nilo, khawvel changkang chhoh zelnaa hma hruai ve thei tura kal kawng kan in sialpuina tur a ni. Sawrkar leh mipuite tang tlangin ram nuam leh thangduang kan nih theihna tura kan in lawm tawnna tur thuthlung a ni. MNF Party Manifesto rintlak anih lohzia Mizoram mipuiten kan hre chiang tulh tulh a, mahni intiamna pawh hlen zo lo party an ni, a ti bawk.
Congress party chungchangah Dr. Mala chuan, “History en let ila, Congress Party-in kan ti ang kan tihah kan dingnghet tlat thin. Chuvangin Manifesto-a kan tarlante hi chu enchhin chawp ngai lovin kan ti thei chiang a ni. Congress Party hi a chhelai siamtha thin party kan ni a. Tuirial Hydel Project MNF Sawrkar-in a sawp chhiat vekte, Falkawn Referal Hospital tlu chhe vek tawhte pawh mipuite tan a ni tih kan chian em avangin harsatna chi tinreng karah kan tungding leh a ni. Vawiina kan ram sum dinhmun chhe ta em em te pawh hi Congress Party bawk lo chu rawn siam tha thei an awm lo a ni. Sawrkar ngawr ngawr nilo, Sawrkar tha mipuite tan buatsaih kan tum mek a, chu sawrkar tha-ah chuan MLA/Minister te tan tun sorkar mek ang a hausak thur thurna a awm thei lovang. Mipui rawng an bawlnaah channa tam tak a awm zawk ang, mahse kan ram mipuite tan erawh an chanvo diktak hmasawnna tur a awm thung ang, a ti.
Nizana inthlawhchhuah programme hi Chhinga Veng B. Lalngaihawma Inah neih niin MPYCC President Dr. Mala chuan Congress party zawm thar chhungaw 4 atangin voters mi 13 te Congress party ah a lawmlut nghal a. Chhinga veng Unit 3 hruaitu mi 70 chuang telin, Congress Thalai President chuan, “Congress Party a kan workers thahnem ngai tak tak te Pathian chakna ring chung leh tawngtaina nen kan ram mipuite tan Sorkar Tha kan siamna turah huaisen taka inpekna thar leh tumruh leh zualna nen tan i la tlang ang u”, tiin party workers te chu a fuih a. Zanin hian Maubawk Unit te a thawhpuite nen hian an tlawh leh dawn a ni.
