Vawiin ni 8.4.2022 (Zirtawpni)-a Mizo Hnam Run Chhung Inkhawmah Dr Vanlaltanpuia MLA, Mizoram Youth Commission Chairman chuan, “MNF Party chu Pathianin a din Party a ni a, ‘Pathian leh kan ram tan’ titu Party kan nih avangin Diamond Jubilee kan thleng thei a, hma kan sawn zel dawn,” a ti.
Pu Tanpuia MLA chuan, “India ram pumah Political Party Kum 60 (Diamond Jubilee) tling thei hi an tam lo hle a, Congress te pawh Party senior angin lang mahse, kum 1885-a din ni mah se, Congress (R), Congress (O)-ahte phelin, 1979 khan Rajiv Gandhi hruai Congress (I) a ni chho a, Kum 60 an la tling lo, India rama Party thang duang tak BJP pawh 1980-a din chauh a ni. Kum 60 an la tling chuang lo. Keini MNF Party hi chu zan khat pawh hming kan la thlak chhin eih lo, Pathianin a din Party kan ni a, MNF nihna ril ber pawh Pathian nihna kengtu Party kan nihna hi a ni. Kum 60 Pathianin he Party hi a lo hruai ta a, hma kan sawn zel a; Keini MNF Party Politics Lungphum chu tawrhna te, thisen chhuahna te, harsatna paltlang tam tak Party kan ni a, he Party belchianga hrechiang apiangten an rawn zawm thar zel a, MNF Party chuan chi tha kan tuh avangin Party thangduang ber kan ni ta a. Chi nung kan tuh a, ram tan kan thisen kan hlan tawh a, keini anga Hnama chiang Party dang a awm ve em ni?” a ti.
“Tunlaiin Party thenkhat chu Rizai hnuaiah an duh duh an sawi a, an duh zawng zawng an au chhuahpui ve a, Issue-base-a kalpui Party te pawh kan awm, keini Party nen chuan kan inang lo. Keini chu Idealogy nghet tak nei kan ni a, Party dang kan ang ve lo. Mizo mipuiah MNF Party tobul leh nihphung hrechiang apiangte chu he Party-ah hian an lo lut a, an lo lut zel dawn bawk. Kum 1961 atanga 1966 vel khan Mizote hi India sorkar hian min dah pawnlang hle a, min la recognise lo hle. Tichuan, Ka nu leh pa, kan rual U-te chu Mizote Khawvel hriata kan inphochhuah ve theih nan tiin, kum 20 tal tawp harsatna leh hrehawm karah Ram an mu a, Pathian hriatpuia pen chhuak an nihna chu Pathianin mal a sawm a, India mi hriat kan ni ve ta a, kum 1986-ah State puitling kan ni ve ta a nih kha. Overground Politics-ah kan lut ta a, Nationalism hi kan chawisan zel a pawimawh. Khawvel ramin Mizoram hi an hriat ve theih nan theihtawp chhuah zel hi kan tih tur a ni awm e. Chumi atan Pathian rawn chung zelin, kan Budget te hi kan bihchian a, kan enfel a ngai. Ram tan thil tha tur kan enfel zel pawh a ngai a ni,” Pu Tanpuia chuan a ti bawk.
MYC chairman chuan, “Hripui leng avangin hun harsa leh khirh kan hmachhawn nghal a, kan Chief Minister zahawm tak thahnemngaihna avangin thi lova ruangin kan dam chhuak a. Hetih lai karah hian Party dangten nasa taka min puh chhe chungin, vawiin ni-ah hian hmalam panin kan kal zel a, Kum 2023 hian Inthlanpui kan hmachhawn leh dawn a, Zoram mipuite hian min khawngaih leh dawn, Kan sorkar leh dawn a ni. Hun tlem kan la neih lai hian, ‘Pathian leh kan ram tan’ titu Party kan nih avangin, Rinawmna leh dikna nen hmalam pan zel ila, ‘Sem sem dam dam, ei-bil thi thi’ tih hi i vawng nung zel ang u,” a ti.
