Vawiin, February ni 3, 2023 (Zirtawpni)-a PC Party Office building sak ṭhat tur ṭhiahna a thawk chhuak party mi te hma ah Pu Lalrinzuala Chawngthu, Sr.Vice President chuan, ”PC Party Office building thar – ‘Brig. T. Sailo Rûn’ sak hna kan ṭan lai hian MLA General Election atan pawh kan inpuahchah chho mup mup a, PC mipuite pawh Office thar sak tur leh election atan rilru lo siam sauh sauh turin ka chah a ni,” a ti.
Pu Rina chuan, ”Israel fate kum 40 zet Sinai thlalerah chawmhlawm ni chunga puar leh fàn châka an chhâwlhal ang khan hmasawnna ngelnghet leh rotling neia puar châkin kum 40 zet kan vakvai mêk a. He kan vahvaihna aṭang hian: dik leh ṭha zawk, dan hmanga rorelna, in nei lo te’n chenna in an neih a, hna nei lo te’n hna an neihna tur sawrkar rin tlak – ‘Kanan ram’ kan chuangkai thuai dawn. Tunah kan Party Office building pawh kum 40 hnu ah kan ṭhiat ta a ni.
Kumin inthlanpuiah hian sawrkarna fawng chelhtu zîngah kan tel ngei dawn a, kan hawi lamin sawrkar siamna kawngah awmzia a nei hle dawn. Sawrkarna ah telin thawnthu ang lek leka ṭhangthar te’n an hriat riai ruai tawh Pu Ṭhena hmathlir(Vision) kha vawiinah pawh kan ram, kan hnam leh kan sakhaw himna leh hmasawnna bulpui ni a mi thiam leh mi puitling te’n an ngaih avangin ‘Brig. T. Sailo Rûn’ din thar rualin kan tungding dawn a ni,” a ti bawk.
